امریکی محکمہ خارجہ نے جمعہ کو مغربی کنارے میں آباد کاروں کے ہاتھوں ایک فلسطینی کے قتل کی مذمت کرتے ہوئے اس واقعے کو دو ٹوک زبان الفاظ میں دہشت گردی قرار دیا ہے، ترجمان امریکی محکمہ خارجہ کی جانب سے بیان میں مکمل احتساب اور انصاف کا مطالبہ کرتے ہوئے کہا کہ ہم انتہا پسند اسرائیلی آباد کاروں کے دہشت گردانہ حملے کی شدید مذمت کرتے ہیں جس میں ایک 19سالہ فلسطینی ہلاک ہو گیا تھا۔ واضح رہے کہ اسرائیلی پولیس نے دو آباد کاروں کو جمعہ کے روز رام اللہ کے مشرق میں واقع گائوں رقہ کے قریب پیش آنے والے اس واقعے کے سلسلے میں گرفتار کیا ہے۔ فلسطینیوں کا کہنا تھا کہ دونوں ایک گروپ کا حصہ تھے جس نے پتھر پھینکے ، کاروں کو آگ لگائی اور فائرنگ کی، جس سے ایک 19سالہ نوجوان ہلاک اور دیگر زخمی ہو گئے۔

کریڈٹ: انڈیپنڈنٹ نیوز پاکستان-آئی این پی