عراق میں امریکی ڈرون حملے میں عراقی ملیشیا کے کمانڈر 4 ساتھیوں سمیت جاں بحق ہوگئے۔ امریکی پینٹاگون نے اپنے بیان میں کہا ہے کہ بغداد کے شمالی علاقے میں عراقی کمانڈر مشتاق جواد کاظم الجواری کی گاڑی کو نشانہ بنایا گیا تھا ، مشتاق جواد کاظم الجواری عراقی ملیشیا حرکتہ النجبہ (Nujaba) کے کمانڈر تھے۔ پینٹاگون نے دعوی کیا ہے کہ جس کمانڈر کو مارا گیا ہے وہ امریکی اہلکاروں پر حالیہ حملوں میں ملوث تھے، حملے میں کسی شہری اور انفراسٹرکچر کو کوئی نقصان نہیں پہنچا۔ اسرائیلی جنگ سے غزہ میں تباہی کے بعد سے عراق اور شام میں امریکی اہلکاروں پر ایک سو سے زائد حملے کیے جا چکے ہیں۔ رپورٹس کے مطابق عراق میں امریکی فوج کے ڈھائی ہزار اور شام میں 9 سو فوجی موجود ہیں۔ دوسری جانب عراقی ملیشیا کے کمانڈر ابو عقیل الموسوی نے حملے کا بدلہ لینے کی دھمکی دی ہے ، عراقی وزیراعظم کے ترجمان نے حملے کی مذمت کرتے ہوئے اسے عراقی سکیورٹی تنظیم پر بلاجواز حملہ قرار دیا ہے۔

کریڈٹ: انڈیپنڈنٹ نیوز پاکستان-آئی این پی