تھائی لینڈ میں دو بھارتی خواتین کو مبینہ طور پر سو سے زائد زندہ جنگلی جانوروں کی اسمگلنگ کرتے ہوئے گرفتار کر لیا گیا۔غیر ملکی میڈیا رپورٹس کے مطابق تھائی لینڈ کے حکام نے بنکاک کے سوورنا بھومی ائیرپورٹ پر دو بھارتی خواتین کو اپنے سامان میں سو سے زائد زندہ جنگلی جانوروں کو اسمگل کرنے کی مبینہ کوشش کے الزام میں گرفتار کیا۔اس حوالے سے تھائیحکام نے ایک پریس ریلیز جاری کی۔ پریس ریلیز میں تھائی لینڈ کے محکمہ وائلڈ لائف کے افسر کا کہنا تھا کہ خواتین کے سامان کی تلاشی کے دوران دو سوٹ کیسوں میں 35 کچھوے، 50 چھپکلیاں، 20 سانپ اور دیگر جنگلی جانور زندہ حالت میں ملے۔بین الاقوامی غیر قانونی منڈی میں ان جانوروں کی مالیت تقریباً 4.5 لاکھ روپے بتائی جاتی ہے۔تھائی حکام نے بتایا کہ سوٹ کیس دو بھارتی خواتین نتھیا راجہ اور ذکیہ سلطانہ ابراہیم کے تھے جو بھارتی شہر چنئی جانے والی پرواز میں سوار ہونے والی تھیں۔حکام کے مطابق ان خواتین کو 2019 کے وائلڈ لائف کنزرویشن اینڈ پروٹیکشن ایکٹ، 2015 کے اینیمل ڈیزیز ایکٹ اور 2017 کے کسٹم ایکٹ کی خلاف ورزی کے الزام میں گرفتار کیا گیا ہے۔البتہ حکام نے یہ نہیں بتایا کہ مشتبہ خواتین کا ان جانوروں کو اپنے ساتھ لے جانے کا مقصد کیا تھا۔

کریڈٹ:
انڈیپنڈنٹ نیوز پاکستان-آئی این پی