پاکستان گلگت بلتستان کے علاقے میں خنجراب نیشنل پارک کی حقیقی صلاحیتوں سے فائدہ اٹھا کر ماحولیاتی سیاحت کو فروغ دے سکتا ہے۔ویلتھ پاک سے بات کرتے ہوئے، گلگت بلتستان کے محکمہ سیاحت کے ڈپٹی ڈائریکٹر راحت کریم بیگ نے کہاکہ قومی اور بین الاقوامی سطح پر خنجراب نیشنل پارک کی ناکافی تشہیر ماحولیاتی سیاحت کی ترقی میں رکاوٹ ہے۔ "قومی پارک کسی ملک کے لیے عظیم اثاثہ ہیں کیونکہ یہ وہ جگہیں ہیں جہاں ذمہ دارانہ سیاحتی طریقوں کو فروغ دیا جا سکتا ہے۔"انہوں نے کہا کہ مقامی کمیونٹیز کو نیشنل پارک میں نباتات اور حیوانات کی حفاظت کی اہمیت سے بھی آگاہ کیا جانا چاہیے۔ "ذمہ دارانہ سیاحت، تحفظ اور فطرت کی حفاظت مقامی لوگوں کی شمولیت کے بغیر ممکن نہیں ہو سکتی۔"بیگ نے کہا کہ پاکستان اور چین کے درمیان سرحدی راہداری خنجراب نیشنل پارک سے گزرتی ہے۔ انہوں نے کہا کہ پارک کے علاقے کو بفر زون قرار دیا جائے تاکہ اس کے تحفظ میں مدد مل سکے۔بیگ نے کہامقامی لوگوں کی رہنمائی کرنا بھی ضروری ہے کہ نیشنل پارکس گھومنے پھرنے کی عام جگہیں نہیں ہیں بلکہ یہ خاص محفوظ جگہیں ہیں۔ ان جگہوں کی دیکھ بھال نہ صرف لوگوں کے لیے پائیدار ذریعہ معاش فراہم کرے گی بلکہ موسمی اثرات سے نمٹنے میں بھی مدد کرے گی۔انہوں نے کہا کہ خنجراب نیشنل پارک خوبصورت قراقرم رینج میں واقع ہے جو کہ نایاب نباتات اور حیوانات کا ایک محفوظ مقام ہے۔

"تمام اسٹیک ہولڈرز بشمول حکومت اور مقامی کمیونٹیز کو پارک کی حقیقی شکل کو برقرار رکھنے کے لیے تعاون کرنا چاہیے۔"جی بی کے محکمہ سیاحت کے اہلکار نے اس پارک کی منفرد خصوصیات کو اجاگر کرنے کے لیے ٹارگٹڈ مارکیٹنگ مہم شروع کرنے کی وکالت کی۔ انہوں نے ٹور آپریٹرز، لوکل گائیڈز اور دیگر تمام اسٹیک ہولڈرز کے لیے صلاحیت سازی کے پروگرام شروع کرنے پر بھی زور دیا۔ویلتھ پاک سے بات کرتے ہوئے، پاکستان فاریسٹ انسٹی ٹیوٹ، پشاور کے ڈپٹی ڈائریکٹر محمد عاطف مجید نے کہا کہ خنجراب نیشنل پارک 1975 میں اس وقت کے وزیر اعظم مرحوم ذوالفقار علی بھٹو نے مارکو پولو بھیڑوں نیز برفانی چیتے اور بھرل کی حفاظت کے لیے قائم کیا تھا۔ علاقہ "تقریبا 17,000 فٹ کی بلندی پر اور تقریبا 2,269 مربع کلومیٹر کے رقبے پر محیط، خنجراب نیشنل پارک بلاشبہ ایک دلکش جگہ ہے۔انہوں نے کہا کہ سیاحت دور دراز علاقوں میں آمدنی کا ایک اچھا ذریعہ ہو سکتی ہے جہاں آمدنی پیدا کرنے کا کوئی دوسرا باقاعدہ ذریعہ دستیاب نہیں ہے۔ "لیکن یہ ذہن میں رکھنے کی بھی ضرورت ہے کہ قومی پارکس عام جگہیں نہیں ہیں، اور انہیں باقاعدہ سیاحتی مقامات میں تبدیل نہیں کیا جا سکتا۔ سخت ضابطہ اخلاق کے تحت صرف انتہائی ذمہ دارانہ سیاحت کی اجازت دی جا سکتی ہے تاکہ قدرتی نباتات اور حیوانات کو کوئی نقصان نہ پہنچے۔

کریڈٹ: انڈیپنڈنٹ نیوز پاکستان-آئی این پی ویلتھ پاک