پی ایس ایل ٹیم ملتان سلطانز کے کپتان محمد رضوان نے کہا کہ میں ملتان سلطانز کے ساتھ ساتھ 25 کروڑ پاکستانیوں کا بھی کپتان ہوں۔ نیشنل سٹیڈیم میں کراچی کنگز کے خلاف میچ سے قبل ٹریننگ کے موقع پر میڈیا سے گفتگو کرتے ہوئے کہا کہ ماضی میں کی جانے والی غلطیوں کو دہرانے سے اجتناب کریں گے۔ان کا مزید کہنا تھا کہ مداحوں کی ناراضگی اپنی جگہ درست ہے، فینز ہم سے خفا ہیں، وہ بھی درست ہیں کہ ہم اپنی ذمہ داری ادا نہیں کر سکے، تنقید کے مقابلے میں محبت زیادہ ملتی ہے، مداحوں کی باتیں بھی سننا پڑتی ہیں، بیجا تنقید پر افسوس ہوتا ہے۔ملتان سلطانز کے کپتان نے کہا کہ ہر انسان سیکھتا ہے، تنقید برائے اصلاح ہونی چاہئے، سینئرز کی ذمہ داری ہے کہ وہ اپنے جونیئرز کو سکھائیں، اگر تنقید ہی کرتے رہے تو نفرت بڑھے گی، شاہد خان آفریدی کے الفاظ میرے حق میں ہیں، ان کو بطور کپتان میرے پاس اختیار نہ ہونے کا سوال نہیں کرنا چاہئے تھا۔

محمد رضوان نے کہا کہ قومی سلیکشن کے حوالے سے سب جانتے ہیں، پاکستان سلیکشن کمیٹی کے اختیارات کا سب کو علم ہے، یہ بات خوش آئند ہے کہ ملتان سلطانز میں مجھے اختیارات حاصل ہیں، مجھے فخر ہے کہ میں سچ بولتا ہوں۔ان کا کہنا تھا کہ تعلیم حاصل نہ کرنے کا افسوس ہے توجہ کرکٹ پر ہے، مانتا ہوں کہ زیادہ اچھی انگریزی نہیں آتی، اگر انگریزی چاہتے ہیں تو میں پروفیسر بن جائوں گا، سابق ٹیسٹ کپتان مصباح الحق کا بطور ہیڈ کوچ مجھے بطور اوپنر کھلانے کا فیصلہ درست تھا۔انہوں نے کہا کہ کراچی کنگز ایک مضبوط ٹیم ہے، کراچی کنگز میں بہترین کھلاڑی موجود ہیں، کراچی کنگز اور کراچی سے محبت ہے، ملتان سلطانز کے پاس بھی اچھے کھلاڑی ہیں، کسی بھی ٹیم کی کارکردگی کا انحصار اس کے کمبی نیشن پر ہوتا ہے۔

کریڈٹ: انڈیپنڈنٹ نیوز پاکستان-آئی این پی