سپریم کورٹ کی بیسمنٹ کینٹین میں گیس سلنڈر دھماکے کے نتیجے میں 4 افراد زخمی ہو گئے۔ تفصیلات کے مطابق منگل کی صبح دھماکے سے سپریم کورٹ کی عمارت لرز گئی ، زخمیوں کو فوری طبی امداد کے لیے اسپتال منتقل کر دیا گیا ، ایک کی حالت تشویشناک بتائی جا رہی ہے۔ دھماکے سے کینیٹین میں فرنیچر کو بھی نقصان پہنچا ، بار ایسوسی ایشن کے استقبالیہ کے شیشے ٹوٹ گئے جبکہ کورٹ نمبر 6 بھی متاثر ہوئی ،دھماکے سے قبل جسٹس علی باقر نجفی اورجسٹس ملک شہزاد سماعت کر رہے تھے۔متعلقہ حکام نے دھماکے کی تحقیقات شروع کر دی ہیں۔ ریسکیو ذرائع نے بتایا کہ دھماکا اے سی گیس پلانٹ کی مرمت کے دوران ہوا، جس سے سپریم کورٹ کی عمارت لرز اٹھی۔ جس کے فورا بعد وکلا اور سپریم کورٹ کا عملہ عمارت کے باہر کھلی جگہ پر نکل آئے۔

کریڈٹ: انڈیپنڈنٹ نیوز پاکستان-آئی این پی