سندھ اعلی تعلیمی کمیشن نے صوبے کی سرکاری جامعات میں غیر تدریسی یا انتظامی آسامیوں پر تعینات اساتذہ کو فوری ہٹائے کے احکامات جاری کردیئے۔اس حوالے سے لکھے گئے خط میں سندھ ایچ ای سی نے سخت موقف اختیار کیا اور دو علیحدہ علیحدہ عدالتی احکامات کو ریفرنس بناتے ہوئے جامعات کے وائس چانسلرز کو 8 روز کی مہلت دی ہے اور کہا ہے کہ عملدرآمد نہ کرنے کی صورت میں نتائج کی ذمہ دار خود یونیورسٹی انتظامیہ ہو گی۔واضح رہے کہ اس وقت سندھ کی سرکاری جامعات کی تعداد 30 کے قریب ہے جن میں سے بیشتر میں رجسٹرار، ناظم امتحانات، ڈائریکٹر کوالٹی انہاسمنٹ سیل و دیگر بجٹڈ اور نان بجٹڈ اسامیوں پر فیکلٹی اراکین ہی تعینات ہیں۔اکثروائس چانسلرز کا یہ موقف ہے کہ جامعات اس وقت شدید مالی بحران سے دوچار ہیں اگر فیکلٹی اراکین کے پاس ان مذکورہ اسامیوں کا اضافی چارج ہوتا ہے تو انہیں ان آسامیوں پر اضافی تنخواہیں نہیں دینا ہوتیں اور اساتذہ اپنی تنخواہوں میں ہی ان کلیدی عہدوں پر کام کر رہے ہوتے ہیں۔

کریڈٹ: انڈیپنڈنٹ نیوز پاکستان-آئی این پی