وزیر اعظم شہباز شریف 18 فروری کو واشنگٹن ڈی سی پہنچیں گے جہاں وہ 19 فروری کو صدر ڈونلڈ ٹرمپ کی میزبانی میں منعقد ہونے والے بورڈ آف پیس کے پہلے اجلاس میں شرکت کریں گے۔سفارتی ذرائع کے مطابق فیلڈ مارشل جنرل عاصم منیر کا بھی اس موقع پر دورہ واشنگٹن کا امکان ہے، یو ایس انسٹی ٹیوٹ آف پیس میں ہونے والے اس سربراہی اجلاس کی بنیادی توجہ غزہ میں جنگ بندی کو مضبوط بنانے اور علاقے کی تعمیرِ نو کے لیے فنڈ ریزنگ پر مرکوز ہے۔اس بورڈ کی تجویز جنوری 2026 میں ورلڈ اکنامک فورم کے دوران پیش کی گئی تھی جس کی منظوری کے بعد صدر ڈونلڈ ٹرمپ بطور چیئرمین خدمات انجام دے رہے ہیں۔بورڈ کے شرکا میں پاکستان، سعودی عرب، متحدہ عرب امارات، مصر، قطر، بحرین، ترکی، ہنگری، مراکش، کوسوو، البانیہ، بلغاریہ، ارجنٹینا، پیراگوئے، قازقستان، منگولیا، ازبکستان، انڈونیشیا اور ویتنام شامل ہیں۔واضح رہے کہ بورڈ کی مستقل رکنیت کے لیے ایک ارب ڈالر کی شراکت لازمی قرار دی گئی ہے۔

کریڈٹ: انڈیپنڈنٹ نیوز پاکستان-آئی این پی