سانس، دل اور اعصابی امراض میں اضافے کے پیش نظر سندھ حکومت نے ٹائر جلانے اور پائرو لائسز پلانٹس پر مکمل پابندی کا فیصلہ کیا ہے ۔یہ فیصلہ وزیراعلی سندھ کی زیر صدارت ہونے والے صوبائی کابینہ کے اجلاس میں کیا گیا۔ صوبے بھر میں ٹائر جلانے اور پائرو لائسز پلانٹس کے آپریشن پر پابندی عائد کی گئی ہے ۔سیکریٹری ماحولیات نے بتایا کہ ٹائر جلانے اور ناقص پلانٹس کے باعث فضا، مٹی اور پانی بری طرح متاثر ہو رہے ہیں جبکہ ٹائر جلانے سے سانس، دل اور اعصابی امراض میں اضافہ دیکھا جا رہا ہے، جب کہ پائرو لائسز جیسے خطرناک عمل نے کراچی کی فضائی آلودگی کو خطرناک سطح تک پہنچا دیا ہے۔سیکریٹری ماحولیات کا کہنا تھا کہ عوامی صحت کے تحفظ کیلئے ایسے تمام پلانٹس کو فوری طور پر بند کرنے کا فیصلہ کیا گیا ہے تاکہ ماحولیاتی آلودگی پر قابو پایا جا سکے۔سندھ حکومت نے اس فیصلے پر عمل درآمد کیلئے نئے ضابطے تیار کر لئے ہیں جنہیں "سندھ انوائرمنٹل پروٹیکشن ایجنسی ( پابندی بر استعمالِ ناقص ایندھن/ٹائرز) رولز 2025 کا نام دیا گیا ہے۔ ان ضوابط کے تحت ناقص ایندھن، ٹائر آئل اور دیگر خطرناک ضمنی مصنوعات کے استعمال، تیاری اور فروخت پر مکمل پابندی عائد ہو گی۔ڈرافٹ کے مطابق تمام فیول پراسیسنگ اور ری سائیکلنگ پلانٹس کو لائسنس حاصل کرنا، اخراج کنٹرول سسٹم نصب کرنا اور ماحولیاتی معیار پر پورا اترنا لازمی ہوگا۔ خلاف ورزی کی صورت میں بھاری جرمانے، آلات کی ضبطی اور یونٹس کی مستقل بندش جیسے اقدامات کئے جائیں گے۔

کریڈٹ: انڈیپنڈنٹ نیوز پاکستان-آئی این پی