سابق وفاقی وزیر داخلہ راجہ نادر پرویز انتقال کر گئے۔صدر مملکت ،وزیر اعظم سیاسی، سماجی اور عوامی حلقوں نے انکے انتقال پر اظہار افسوس کیا ہے ۔راجہ نادر پرویز کا تعلق فیصل آباد سے تھا اور وہ ایک تجربہ کار سیاستدان کے طور پر جانے جاتے تھے۔راجہ نادر پرویز نے اپنی سیاسی زندگی میں متعدد بار رکن قومی اسمبلی کے طور پر خدمات انجام دیں، مختلف ادوار میں وفاقی وزیر مواصلات اور وفاقی وزیر پانی و بجلی کے اہم عہدوں پر بھی فائز رہے، جہاں انہوں نے انفراسٹرکچر اور توانائی کے شعبے میں نمایاں کردار ادا کیا۔ ان کی پالیسی سازی اور انتظامی صلاحیتوں کو سیاسی مخالفین بھی سراہتے تھے۔سیاسی خدمات کے ساتھ ساتھ راجہ نادر پرویز نے پاک افواج کے اندر بھی مختلف ذمہ داریاں نبھائیں

جو ان کی ہمہ جہت شخصیت کا مظہر ہیں، ملکی سلامتی اور قومی مفاد کے معاملات پر ان کی رائے کو ہمیشہ اہمیت دی جاتی رہی۔خاندانی ذرائع کے مطابق مرحوم کی نماز جنازہ راولپنڈی کے آرمی قبرستان میں ادا کی گئی، میں سیاسی شخصیات، عسکری حکام، اہلِ علاقہ اور مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی ۔راجہ نادر پرویز کے انتقال پر صدر مملکت آصف زرداری، وزیر اعظم شہبازشریف دیگر سیاسی رہنمائوں اور عوامی نمائندوں نے گہرے دکھ اور افسوس کا اظہار کرتے ہوئے مرحوم کی مغفرت اور لواحقین کیلئے صبر جمیل کی دعا کی ہے۔ ان کی وفات کو ملکی سیاست کیلئے ایک بڑا نقصان قرار دیا جا رہا ہے۔

کریڈٹ: انڈیپنڈنٹ نیوز پاکستان-آئی این پی