پی ڈی ایم اے پنجاب ،خیبرپختونخوا کے بیشتر اضلاع اور کراچی میں بارش اور سردی کی شدت میں اضافے سے متعلق الرٹ جاری کر دیا ۔پی ڈی ایم اے پنجاب کے مطابق 16سے 19 جنوری کے دوران مغربی ہوائوں کا سسٹم پنجاب میں داخل ہو رہا ہے ، 20 سے 23 جنوری کے دوران مری گلیات اور دیگر پہاڑی علاقوں میں شدید برفباری اور بارش کا امکان ہے۔پی ڈی ایم اے کے مطابق 20 سے 23 جنوری کے دوران پنجاب کے بیشتر اضلاع میں بارش کا امکان ہے۔ لاہور، سرگودھا، گجرانوالہ، ساہیوال، ملتان، فیصل آباد، ڈیرہ غازی خان اور بہاولپور ڈویژن میں بارش کا امکان ہے۔لوکل گورنمنٹ، محکمہ صحت، ریسکیو 1122، پولیس اور محکمہ ٹرانسپورٹ کو الرٹ جاری کر دیا گیا ہے۔وزیر اعلی پنجاب کی ہدایات کے پیش نظر تمام تر انتظامات پیشگی مکمل کریں۔ڈی جی پی ڈی ایم اے پنجاب عرفان علی کاٹھیا کا کہنا تھا کہ ایمرجنسی کنٹرول رومز میں اسٹاف کو 24 گھنٹے الرٹ رکھا جائے۔ ریسکیو 1122 کی ڈائزاسٹر رسپانس ٹیموں کو بھی ہائی الرٹ رکھا جائے۔

انہوں نے ہدایت کی کہ شہری خراب موسم کی صورتحال میں غیر ضروری سفر سے گریز کریں، مری میں سیاح احتیاطی تدابیر اختیار کریں اور ہدایات پر عمل کریں۔ سیاحوں کی سہولیات کے لیے مری میں مختلف مقامات پر فسیلیٹیشن سنٹرز قائم ہیں۔ڈی جی عرفان علی کاٹھیا کا کہنا تھا کہ تیز رفتاری اور اچانک بریک لگانے سے اجتناب کریں، دوران سفر فوگ لائیٹس کا استعمال کریں اور عوام جاری کردہ احتیاطی تدابیر پر عمل کریں۔ترجمان پی ڈی ایم اے کے مطابق شہری ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں۔ پی ٹی ڈی ایم نے گلگت بلتستان، بالائی خیبرپختونخوا اور آزاد کشمیر میں ممکنہ شدید سردی کی لہر کا الرٹ بھی جاری کیا ہے ۔این ڈی ایم اے کے مطابق آئندہ دنوں میں جنوری کے آخر تک رات اور صبح کے اوقات میں شدید سرد موسم متوقع ہے۔ بالائی علاقوں میں درمیانے سے شدید درجے کی برفباری کا امکان ہے جس سے رابطہ سڑکیں، ٹرانسپورٹ اور بجلی کی فراہمی متاثر ہو سکتی ہے۔ این ڈی ایم اے کے مطابق پہاڑی علاقوں میں ممکنہ برفباری کے باعث برفانی تودے گرنے اور پھسلن کے خطرات میں اضافہ ہوگا۔ میدانی علاقوں میں سرد و خشک موسم اور بعض مقامات پر کورا پڑنے کا امکان ہے

جس سے فصلوں اور باغات کو نقصان کا خدشہ ہے۔ ادھر خیبرپختونخوا میں گرج چمک کے ساتھ بارش اور پہاڑوں پر برفباری کا امکان ہے۔پی ڈی ایم اے کے مطابق 23 جنوری تک صوبے میں وقفے وقفے سے بارش اور برفباری کا امکان ہے۔اس کے علاوہ پہاڑی علاقوں میں لینڈ سلائیڈنگ اور برفانی تودیگرنے کا بھی خطرہ ہے جب کہ میدانی علاقوں میں دھند چھائے رہنے کا امکان ہے۔اس کے علاوہ پنجاب کے بیشتر اضلاع میں بارش اور سردی کی شدت میں اضافے کا الرٹ بھی جاری کیا گیا ہے۔دوسری جانب محکمہ موسمیات نے کراچی میں آئندہ ہفتے کے دوران گرج چمک کے ساتھ بارش کا امکان ظاہر کیا ہے ۔ جنوب مغربی سمت سے چلنے والی ہوائوں کے سبب کراچی میں ہلکے بادلوں کے ساتھ موسم خنک ہوگیا جبکہ ہوا میں نمی کا تناسب 87 فیصد ہے۔کمزور مغربی ہوائوں کا سلسلہ ملک میں داخل ہوگ یا جس کے باعث کراچی میں 22 اور 23 جنوری کو گرج چمک کے ساتھ بارش کا امکان ہے۔

کریڈٹ: انڈیپنڈنٹ نیوز پاکستان-آئی این پی