وزیراعلی پنجاب مریم نواز شریف نے کہا ہے کہ بچوں کے خلاف تشدد اور بھیانک جرائم کا خاتمہ یقینی بنایا جا رہا ہے، چائلڈ لیبر کے خاتمے کے لئے سخت کریک ڈائون جاری ہے۔ ورلڈ چِلڈرن ڈے پر پیار اور شفقت بھرے پیغام میں وزیراعلی مریم نواز شریف کا کہنا تھا کہ میرے پاکستان کا ہر بچہ لخت جگر ہے، اپنی اولاد کی مانند میرا مستقبل، میری ذمہ داری اور اولین ترجیح ہے، پنجاب کے ہر بچے کو محبت، دعاں اور رحمتوں سے بھرپور سلام پیش کرتی ہوں۔ انہوں نے کہا کہ جہاں بچے محفوظ ہوں وہاں مستقبل روشن ہوتا ہے، پنجاب حکومت کا ہر قدم بچوں کی بھلائی، حفاظت اور خوشیوں کیلئے ہے، بچوں کی صحت اور اعلی تعلیم ہماری پہلی ترجیح ہے۔ ان کا کہنا تھا کہ چائلڈ ہارٹ سرجری پروگرام سے ہزاروں بچوں کی زندگیاں بچائیں، ٹائپ-ون شوگر کے مریض بچوں کو انسولین کِٹس گھر گھر پہنچا رہے ہیں، آٹسٹک بچوں کے لئے پاکستان کا پہلا خصوصی آٹزم سکول قائم کر دیا جس کا جلد افتتاح ہوگا،ننھے بچوں کے لئے نواز شریف انسٹیٹیوٹ آف ارلی ایجوکیشن ہر ضلع میں قائم ہوں گے۔

مریم نواز نے کہا کہ ورچوئل سینٹر فار چائلڈ سیفٹی پروگرام بچوں کی گمشدگی،استحصال اور خطرات کے کیسز جدید ترین نظام کے تحت حل کر رہا ہے، چائلڈ لیبر کے انسداد کے لئے سخت کریک ڈاون جاری ہے، بچوں کے خلاف تشدد اور بھیانک جرائم کا خاتمہ یقینی بنایا جا رہا ہے، پنجاب میں بچوں کے تحفظ کے لئے تمام تر اقدامات کئے گئے ہیں۔ وزیراعلی پنجاب کا کہنا تھا کہ غذائی قلت کے شکار بچوں کیلئے جنوبی پنجاب میں سکول میل پروگرام شروع کیا تاکہ بھوک تعلیم کی راہ میں حائل نہ ہو، سرکاری سکولوں کے بچوں کے سکول میں تمام ضروری سہولیات فراہم کی جا رہی ہیں۔ انہوں نے کہا کہ خصوصی بچوں کو مصنوعی اعضا، ہیرنگ ایڈز اور وِیل چیئرز فراہم کر رہے ہیں، کوئی بچہ محروم، لاچار یا نظر انداز دکھائی دے تو نیند نہیں آتی، جب تک ہر بچے کی آنکھ میں خوبصورت مستقبل کی چمک نہیں آتی جدوجہد مکمل نہیں ہوگی، پنجاب کاہر بچہ پڑھے گا، صحت مند ہوگا، مسکرائے گا ماں اپنے بچوں کو کبھی تنہا نہیں چھوڑتی۔

کریڈٹ: انڈیپنڈنٹ نیوز پاکستان-آئی این پی