پنجاب حکومت نے بیرونِ ملک روزگار کے خواہشمند نوجوانوںکیلئے پرواز کارڈ پروگرام متعارف کرا دیا ، جس کے تحت ویزا فیس، میڈیکل ٹیسٹ اور ہوائی ٹکٹ سمیت دیگر ابتدائی اخراجات کیلئے بغیر سود مالی معاونت فراہم کی جائے گی۔حکام کے مطابق اس اسکیم کے تحت 100,000 ایسے اہل امیدواروں کو سہولت دی جائے گی جن کے پاس پہلے سے تصدیق شدہ غیر ملکی ملازمت کی پیشکش موجود ہو۔ پروگرام کا مقصد مالی رکاوٹوں کو کم کرتے ہوئے ہنر مند نوجوانوں کو بین الاقوامی روزگار کے مواقع تک رسائی دینا ہے۔اسکیم کیلئے اہل ہونے کے لیے درخواست گزار کی عمر کم از کم 18 سال ہونا ضروری ہے، اس کی مستقل رہائش پنجاب کی ہونی لازمی ہے اور کسی مجاز بیرونِ ملک آجر کی جانب سے جاری کردہ درست ملازمت کی پیشکش درکار ہو گی۔

حکومت کا کہنا ہے کہ درخواستوں کا عمل شفاف اور منظم ہو گا تاکہ اہل امیدوار آسانی سے پروگرام سے فائدہ اٹھا سکیں۔پاکستان میں بیرونِ ملک ملازمت کے خواہشمند افراد کو عموما بھاری ابتدائی اخراجات کے باعث مشکلات کا سامنا رہتا ہے۔ پرواز کارڈ پروگرام ان مسائل کے حل کی جانب ایک اہم قدم قرار دیا جا رہا ہے، جس کا مقصد نوجوانوں کے لیے روزگار کے مواقع بڑھانا اور ترسیلاتِ زر میں اضافہ کرنا ہے۔حکام کے مطابق پروگرام کی باضابطہ درخواست سے متعلق تفصیلات جلد پنجاب حکومت کی ویب سائٹ پر جاری کی جائیں گی۔ تاہم ممکنہ درخواست گزاروں کو ہدایت کی گئی ہے کہ وہ تصدیق شدہ بیرونِ ملک ملازمت کی پیشکش،پنجاب میں رہائش کا ثبوت،شناختی دستاویزات اور عمر کی تصدیق کی صورت میں دستاویزات پاس رکھیں ۔ حکومتی ترجمان نے کہا کہ پرواز کارڈ پروگرام نوجوانوں کو مالی تحفظ فراہم کر کے انہیں اعتماد کے ساتھ بیرونِ ملک روزگار کے مواقع حاصل کرنے کے قابل بنائے گا۔

کریڈٹ: انڈیپنڈنٹ نیوز پاکستان-آئی این پی