وفاقی وزیرخزانہ محمد اورنگزیب کی زیرصدارت پیٹرولیم مصنوعات کی قیمتوں سے متعلق اجلاس میں عالمی منڈی میں تیل کی قیمتوں میں کمی کی صورت میں عوام کو فوری ریلیف دینے پر اتفاق کیا گیا۔وزیرخزانہ محمد اورنگزیب کی زیرصدارت مشرق وسطی میں کشیدگی کے تناظر میں پیٹرولیم مصنوعات قیمتوں پرجائزہ اجلاس ہوا،وزارت خزانہ کیمطابق ٹارگٹڈ سبسڈی سے متعلق نظام کوجلدحتمی شکل دینے پراتفاق کیاگیا،شرکا نے ملک میں پیٹرولیم مصنوعات کی فراہمی کومستحکم اورذخیرہ وافر قرار دیا، اجلاس میں ٹارگٹڈ سبسڈی کیلئے ٹیکنالوجی استعمال کرنے کی تجویز کا جائزہ لیا گیا۔وزارت خزانہ کے مطابق صوبوں نے پیٹرول بچانے کیلئے طرز زندگی میں تبدیلی پر زور دیا،خیبرپختونخوا نے تیل سپلائی مینجمنٹ کوخطے سے بہترقراردیا،بریفنگ میں بتایاگیاکہ حکومت کے پاس مالی گنجائش محدود ہے اورمحتاط فیصلوں کی ضرورت ہے۔اعلامیے کے مطابق اجلاس میں پیٹرولیم لیوی کو آمدن کا بڑا ذریعہ قرار دیا گیا،وزیر خزانہ محمد اورنگزیب نے عوام کو ریلیف دیتے ہوئے معیشت کو مستحکم رکھنے کی ہدایت کے ساتھ سبسڈی اصلاحات پر زور دیا۔

کریڈٹ: انڈیپنڈنٹ نیوز پاکستان-آئی این پی