پاکستان میڈیکل اینڈ ڈینٹل کونسل (پی ایم ڈی سی) نے میڈیکل اور ڈینٹل طلبا کے لیے پاسنگ مارکس اور حاضری سے متعلق اپنے سابقہ سخت فیصلے واپس لے لیے ہیں۔رپورٹس کے مطابق کونسل کی جانب سے نوٹیفکیشن بھی جاری کیا گیا ہے جس کے مطابق میڈیکل اسٹوڈنٹس کے لیے پاسنگ مارکس 50 فیصد اور 75 فیصد حاضری کی شرط دوبارہ مقرر کر دی ہے۔اس سال کے آغاز میں پی ایم ڈی سی نے پاسنگ مارکس 65 فیصد تک بڑھا دیے تھے، جسے اب منسوخ کر دیا گیا ہے۔ تاہم اب نئے نوٹیفکیشن میں سابقہ نوٹیفکیشنز کو منسوخ کر دیا گیا ہے۔نیا فیصلہ تعلیمی سیشن 2024-2025 پر لاگو ہوگا۔اسی طرح، حاضری سے متعلق فیصلہ بھی واپس لے لیا گیا ہے۔ اب میڈیکل( ایم بی بی ایس) اور ڈینٹل(بی ڈی ایس)طلبا کے لیے 75 فیصد حاضری لازمی ہوگی، جبکہ پچھلے فیصلے کے مطابق یہ شرح 85 فیصد کر دی گئی تھی۔مستقبل کے داخلوں کے لیے تجویز دی گئی ہے کہ پاسنگ مارکس اور حاضری دونوں میں 5 فیصد اضافہ کیا جائے۔ یہ تجویز بعد میں یونیورسٹیوں اور دیگر اسٹیک ہولڈرز سے مشاورت کے بعد حتمی کی جائے گی۔پی ایم ڈی سی نے تمام میڈیکل اور ڈینٹل جامعات کو ہدایت کی ہے کہ وہ نئے قواعد و ضوابط پر فوری عملدرآمد یقینی بنائیں۔

کریڈٹ: انڈیپنڈنٹ نیوز پاکستان-آئی این پی