پاکستان سمیت دنیا بھر میں بسنے والی ہندو برادری نے دیوالی کا تہوار مذہبی جوش و جذبے کے ساتھ منایا ۔اس موقع پر مندروں میں خصوصی تقریبات کا اہتمام کیا گیا، اور پاکستانی کی ترقی و خوشحالی کیلئے خصوصی دعائوں کا اہتمام کیا گیا ۔ اس دن کو منانے کیلئے ہندو برادری نے بھگوان رام کی واپسی کی یاد میں اپنی مذہبی رسم کے لئے مٹی کے چراغ بھی جلا ئے ۔یہ تہوار شری رام چندر جی کی قربانیوں کو یاد کرنے کیلئے منایا جاتا ہے جنہوں نے تقریبا چودہ سال جنگلوں میں گزارے اور ہندو مذہب کی تبلیغ کی۔دریں اثنا صدر آصف زرداری نے ہندوبرادری کے تہوار دیوالی کے موقع پر اپنے پیغام میں کہا کہ دیوالی اندھیرے پر روشنی، بدی پر نیکی کے غلبے کی علامت ہے، یہ تہوار امن، رواداری، ہمدردی، ہم آہنگی جیسی آفاقی اقدار کی یاد دہانی کراتا ہے۔انہوں نے کہا کہ آئین پاکستان تمام شہریوں کو مساوی حقوق، مذہبی آزادی کی ضمانت دیتا ہے، ہمیں ایسا معاشرہ قائم رکھنا ہے جہاں تمام مذاہب کے لوگ عزت واحترام سے رہ سکیں۔انکا کہنا تھا کہ قائداعظم نے ایسے پاکستان کا تصور پیش کیا تھا جہاں اقلیتوں کو مساوی حقوق حاصل ہوں، ہندوبرادری پاکستان کے سماجی، ثقافتی، معاشی ڈھانچے کا اہم حصہ ہے۔آصف زرداری نے کہا کہ تعلیم، تجارت، عوامی خدمت کے شعبوں میں ہندوبرادری کی خدمات قابل تحسین ہیں، دیوالی ہمیں رواداری، اتحاد، پرامن بقائے باہمی کے عزم کو تازہ کرنے کی ترغیب دیتی ہے۔

صدر مملکت نے پاکستان، بیرون ملک مقیم ہندوبرادری کے لیے خوشی، امن اور خوشحالی کی دعا بھی کی۔ دریں اثنا وزیراعظم محمد شہباز شریف نے کہا ہے کہ دیوالی کا یہ تہوار امید، اتحاد اور مثبت سوچ کی علامت ہے۔دیوالی کے موقع پر پاکستان سمیت دنیا بھر کی ہندو برادری کو مبارکباد پیش کرتے ہوئے وزیراعظم شہباز شریف نے اپنے پیغام میں کہا ہے کہ دیوالی روشنی کی تاریکی پر اور امید کی مایوسی پر فتح کے جشن کی عکاسی کرتی ہے، ہمیں چاہیے کہ اس موقع پر مل کر مستقبل کو مثبت سوچ، اتحاد اور بھائی چارے کے نظریے سے دیکھیں۔شہباز شریف نے کہا ہے کہ پاکستان اپنے ثقافتی اور مذہبی تنوع پر فخر کرتا ہے، یہی تنوع ہمارے قومی دھارے کو مضبوط بناتا ہے۔وزیراعظم نے پاکستان میں ہندو برادری کی سماجی، اقتصادی اور سیاسی شعبوں میں خدمات کو خراجِ تحسین پیش کرتے ہوئے کہا ہے کہ یہ برادری ملک کی ترقی میں اہم کردار ادا کر رہی ہے، قائداعظم محمد علی جناح نے ایک ایسے پاکستان کا تصور پیش کیا جہاں تمام شہریوں کو مذہب، نسل یا ذات سے بالاتر ہو کر مساوی حقوق اور آزادی حاصل ہو۔انہوں نے مزید کہا ہے کہ حکومت ان اقدار پر پوری طرح کار بند ہے اور اس بات کو یقینی بنا رہی ہے کہ تمام برادریوں کو برابر کے مواقع میسر ہوں، دعا ہے کہ روشنیوں کا یہ تہوار امن، خوشحالی اور بین المذاہب ہم آہنگی کو فروغ دے اور پاکستان میں تمام مذاہب کے درمیان اتحاد اور بھائی چارے کے رشتوں کو مزید مضبوط بنائے۔

کریڈٹ: انڈیپنڈنٹ نیوز پاکستان-آئی این پی