وفاقی وزیر اطلاعات عطا اللہ تارڑ نے کہا ہے کہ دہشتگردی کے خلاف پاکستان صفِ اول کا کردار ادا کر رہا ہے اورپاکستان کی دہشتگردی کے خلاف قربانیاں پوری دنیا کے امن کیلئے ہیں۔وفاقی وزیر عطا اللہ تارڑ سے امریکی ناظم الامور نیٹلی بیکر نے ملاقات کی ہے جس میں دو طرفہ تعلقات اور ڈیجیٹل میڈیا شراکت داری سمیت مختلف امور پر تبادلہ خیال کیا گیا۔ وفاقی وزیر عطا اللہ تارڑ نے کہا کہ پاکستان نے دہشت گردی کے خلاف بے شمار قربانیاں دی ہیں جو دنیا کے امن کیلئے سنگ میل ثابت ہوئیں۔ حکومت نے فیک نیوز کے خاتمے اور ڈیجیٹلائزیشن کے فروغ کیلئے جامع پالیسی متعارف کروائی ہے، پاکستان قدرتی حسن، ثقافتی تنوع اور تاریخی ورثے سے مالا مال ملک ہے، سیاحت کے فروغ سے معاشی سرگرمیوں میں اضافہ اور دونوں ممالک کے عوام میں روابط مضبوط ہوں گے۔

عطا اللہ تارڑ نے مزید کہا کہ حکومت سیاحت کے فروغ کیلئے ٹھوس اقدامات کر رہی ہے، جس کا مقصد پاکستان کو عالمی سیاحتی نقشے پر نمایاں مقام دلانا ہے۔ان کا کہنا تھا کہ صحافیوں کی فلاح و بہبود کیلئے بھی قانون سازی کی جا رہی ہے۔ اس پر امریکی ناظم الامور نے پاکستان کی جانب سے صحافیوں کے تحفظ کیلئے اقدامات کو سراہا۔اس موقع پر امریکی ناظم الامور نے دہشتگردی کے خلاف پاکستان کے صفِ اول کے کردار کی تعریف کی اور کہا کہ پاکستان کی معیشت استحکام اور ترقی کی سمت بڑھ رہی ہے جبکہ دہشت گردی کے خلاف پاکستان کے صفِ اول کے کردار کی تعریف کرتے ہیں۔

کریڈٹ: انڈیپنڈنٹ نیوز پاکستان-آئی این پی