وزیر تعلیم سندھ سید سردار علی شاہ سے گرینڈ الائنس آف پرائیویٹ سکولز ایسوسی ایشنز کے وفد کے مذاکرات کامیابی ہوگئے جس کے بعد مسائل حل کرنے کی یقین دہانی پر نجی سکولز ایسوسی ایشن نے کل 9 جنوری کی اعلان کردہ ہڑتال کے فیصلے کو واپس لینے کا اعلان کردیا۔ملاقات کے موقع پر چیئرمین اینٹی کرپشن اسٹیبلشمنٹ ذوالفقار علی شاہ، سیکریٹری سکول ایجوکیشن زاہد علی عباسی، ڈائریکٹر جنرل پرائیویٹ سکولز محمد افضال، ایڈیشنل ڈائریکٹر رفیعہ ملاح اور دیگر افسران موجود تھے۔وفد نے سندھ میں پرائیویٹ تعلیمی اداروں کے طلبا کی فری شپ ڈیٹا کی تصدیق کے طریقہ کار پر تحفظات کا اظہار کیا، اینٹی کرپشن کے ذریعے تصدیق کے عمل پر گرینڈ الائنس آف پرائیویٹ سکولز ایسوسی ایشنز سندھ کے بہت سے خدشات اور تحفظات ہیں۔صوبائی وزیر تعلیم نے کہا کہ گرینڈ الائینس آف پرائیویٹ سکولز ایسوسی ایشنز کے وفد کے خدشات کا احترام ہے، ڈیٹا ویریفکیشن کا میکنزم کا طریقہ طے نہ ہونے کی وجہ نجی سکول انتظامیہ کو مسائل درپیش آئے۔

ملاقات میں اینٹی کرپشن کی تصدیق کے مربوط طریقہ کار پر اتفاق کیا گیا سکولز اور والدین کے تمام خدشات کا مکمل خیال رکھا جائے گا تا کہ سکول منتظمین کو کسی قسم کی پریشانی کا سامنا نہ ہو، سید سردار علی شاہ نے کہا کہ پرائیویٹ سکولز کے سندھ کی تعلیم میں مثبت کردار کو سراہتے ہیں۔انہوں نے وفد کے رہنمائوں کو یقین دلایا کہ وہ پرائیویٹ ایجوکیشن سیکٹر کے مسائل اور مشکلات کو حل کرنے کی پوری کوشش کریں گے۔سید سردار علی شاہ کا کہنا تھا کہ ڈائریکٹوریٹ آف انسپیکشن اینڈ رجسٹریشن آف پرائیویٹ انسٹیٹیوشن کے ذریعے ڈیٹا کی تصدیق کے تمام معاملات حل کیے جائیں گے۔دوسری جانب گرینڈ الائنس آف پرائویٹ سکولز ایسوسی ایشنز سندھ کے رہنماں نے وزیر تعلیم سندھ سید سردار علی شاہ کی یقین دہانی اور چئیرمین اینٹی کرپشن ذوالفقار علی شاہ سے اتفاق کرتے ہوئے احتجاج کو فوری طور پر ختم کرنے کا اعلان کیا۔

کریڈٹ: انڈیپنڈنٹ نیوز پاکستان-آئی این پی