وزیر مملکت خزانہ و ریلوے بلال اظہر کیانی نے متحدہ عرب امارات کے وزیر توانائی و انفرا اسٹرکچر سہیل محمد المزروعی سے ملاقات کی ہے ۔ ملاقات میں دونوں ممالک کے درمیان انفرا اسٹرکچر کی ترقی اور ریل نظام کو جدید بنانے کے لیے دوطرفہ تعاون پر تبادلہ خیال کیا گیا۔ابوظبی میں 'گلوبل ریل اینڈ انفرا اسٹرکچر کانفرنس اینڈ ایگزیبیشن' کے انعقاد کے موقع پر وزیر مملکت بلال اظہر کیانی کی یو اے ای حکومت کی دیگر شخصیات سے بھی اہم ملاقاتیں ہوئیں۔بلال اظہر کیانی نے بین الاقوامی نمائش کے دوران متحدہ عرب امارات کی حکومت کی جانب سے پرتپاک استقبال پر سہیل محمد المزروعی کا شکریہ ادا کیا۔ انہوں نے گلوبل ریل کانفرنس اور نمائش کے انعقاد کو ایک دوسرے کے تجربات سے سیکھنے اور باہمی تعاون کے فروغ کا بہترین پلیٹ فارم قرار دیا۔بلال اظہر کیانی نے متحدہ عرب امارات کے مستقبل کے تقاضوں سے ہم آہنگ انفرا اسٹرکچر خاص طور پر اتحاد ریل پروجیکٹ کی تعریف کرتے ہوئے سراہا۔دونوں وزرا نے پاکستان کے ریل انفرا اسٹرکچر کو بہتر بنانے کیلئے متحدہ عرب امارات اور پاکستان کے درمیان تعاون بڑھانے کے امکانات پر بھی بات چیت کی۔دونوں رہنمائو ں نے خطے میں رابطوں کو بہتر بنانے، معاشی ترقی کے فروغ اور ٹرانسپورٹ کے شعبے میں پائیدار حل کے مشترکہ وژن پر تبادلہ خیال کیا۔

کریڈٹ: انڈیپنڈنٹ نیوز پاکستان-آئی این پی