وفاقی وزیر داخلہ محسن نقوی نے عظیم سپاہی لانس نائیک محمد محفوظ شہید کی بے مثال جرات، شجاعت اور قربانی کو زبردست خراجِ عقیدت پیش کیا۔محسن نقوی نے اپنے بیان میں کہا کہ لانس نائیک محمد محفوظ نے 1971 کی جنگ میں شجاعت اور بہادری کی ایسی روشن مثال قائم کی جو ہمیشہ یاد رکھی جائے گی، لانس نائیک محمد محفوظ نے غیر معمولی حوصلے اور جرات کے ساتھ ایک انتہائی خطرناک مشن مکمل کیا اور شہادت کے بلند رتبے پر فائز ہوئے۔انہوں نے کہا ہے کہ ان کی عظیم قربانی سے محاذِ جنگ کا نقشہ بدل گیا اور دشمن کو بھاری نقصان اٹھانا پڑا، ناقابلِ فراموش بہادری کا مظاہرہ کرتے ہوئے لانس نائیک محمد محفوظ نے دشمن کی سب سے مثر دفاعی پوزیشن کو خاموش کیا۔محسن نقوی کا کہنا تھا کہ لانس نائیک محمد محفوظ شہید پوری قوم کیلئے حوصلے، عزم اور قربانی کی مثال ہیں، انہوں نے ثابت کیا کہ فرض کی ادائیگی میں شہادت کا عظیم رتبہ حاصل کرنا ہی ایک پاکستانی سپاہی کے لئے سب سے بڑا اعزاز ہے۔وفاقی وزیر داخلہ نے مزید کہا کہ لانس نائیک محمد محفوظ شہید کا نام تاریخ میں ہمیشہ زندہ رہے گا اور آنے والی نسلیں ان کی جرات و قربانی سے سبق حاصل کرتی رہیں گی۔

کریڈٹ: انڈیپنڈنٹ نیوز پاکستان-آئی این پی