لاہور سمیت پنجاب بھر کی ماتحت عدالتوں میںپیر کو وکلا کی جانب سے جزوی ہڑتال رہی ۔ہڑتال کی کال پنجاب بار کونسل کی جانب سے وہاڑی میں مقامی وکیل کے مبینہ طور پر پولیس کے ہاتھوں قتل کے خلاف دی گئی تھی ۔پنجاب بار کونسل کے چیئرمین ایگزیکٹو ذبیح اللہ ناگرہ نے صوبے بھر کی عدالتوں میں ہڑتال کا اعلان کرتے ہوئے وکلا سے اپیل کی ہے کہ وہ ماتحت عدالتوں میں پیش نہ ہوں۔اس موقع پر جزوی ہڑتال رہی اور وکلا کی جانب سے عدالتی کارروائی کا بائیکاٹ کیا گیا جس سے عدالتی امور ٹھپ ہوگئے ۔سائلین کو مشکلات کا سامنا کرنا پڑا ۔پنجاب بار کونسل کا کہناہے کہ وکیل محمد ذیشان کو پولیس کی فائرنگ سے قتل کیا گیا، جس کی بھرپور مذمت کی جاتی ہے، بار کونسل کا مطالبہ ہے کہ واقعے میں ملوث اہلکاروں کو فوری طور پر گرفتار کرکے قانون کے مطابق کارروائی کی جائے۔پنجاب بار کونسل نے واضح کیا ہے کہ جب تک ذمہ داروں کے خلاف کارروائی نہیں ہوتی، احتجاجی لائحہ عمل جاری رہے گا۔

کریڈٹ: انڈیپنڈنٹ نیوز پاکستان-آئی این پی