سابق وزیر اعظم نواز شریف کی صاحبزادی اور وزیراعلی پنجاب مریم نواز نے زندگی کی 52 بہاریں دیکھ لیں۔اس سلسلے میں ملک بھر میں مسلم لیگ ن زیر اہتمام سالگرہ تقریبات کا اہتمام کیا گیااور کیک کاٹے گئے ۔ مریم نواز 28 اکتوبر 1973 کو پیدا ہوئیں، مریم نواز کی شادی 1992 میں کیپٹن (ر) صفدر سے ہوئی، اعلی تعلیم یافتہ مریم نواز کا سیاسی سفر 2013 کے انتخابات سے شروع ہوا جب انہوں نے مسلم لیگ(ن) کی انتخابی مہم ایسے زبردست اور کامیاب انداز میں چلائی کہ میاں نواز شریف ملک کے تیسری بار وزیراعظم منتخب ہوگئے۔مریم نواز صرف سیاسی میدان میں ہی نہیں بلکہ خواتین کے حقوق اور بچیوں کی تعلیم کے فروغ میں بھی نمایاں ہیں اور اسی بنا پر برطانوی نشریاتی ادارے نے نواز شریف کے دور اقتدار میں انہیں دنیا کی 100 سربراہان مملکت کی بااثر بیٹیوں میں شامل کیا۔وزیر اطلاعات و ثقافت پنجاب عظمی زاہد بخاری نے وزیر اعلی پنجاب مریم نواز شریف کیلئے سالگرہ کے موقع پر تہنیتی پیغام جاری کیا اور کہا کہ پنجاب کی عوام کو اتنے تحفے دینے کا شکریہ۔سماجی رابطے کی ویب سائٹ ایکس پر عظمی بخاری نے وزیراعلی مریم نواز کی عوام کی خدمت بارے تیار کردہ خصوصی ویڈیو بھی جاری کیا۔ان کا کہنا تھا کہ ہم آپ کی لمبی زندگی، صحت اور عوام کی اس سے بڑھ کر خدمت کیلئے دعا گو ہیں۔

کریڈٹ: انڈیپنڈنٹ نیوز پاکستان-آئی این پی