پاکستان کی نجی ائیر لائن ائیر سیال نے ابوظہبی سے اسلام آباد، لاہور کیلئے ہفتہ وار پروازیں شروع کرنے کا اعلان کیا ہے ۔پاکستان کی نجی ائیرلائن کی جانب سے ابوظہبی سے پاکستان کے دو شہروں کیلئے ہفتہ وار متعدد پروازیں آپریٹ کی جائیں گی۔ خلیجی اخبار کے مطابق متحدہ عرب امارات میں رہنے والے پاکستانیوں کو پاکستان کی مقامی نجی ائیرلائن ائیر سیال کی جانب سے بڑی خوشخبری سنائی گئی ہے۔متحدہ عرب امارات میں رہنے والے پاکستانی اب ائیرسیال کے ذریعے قدرے کم کرایہ میں پاکستان کا سفر کر سکیں گے، نجی ائیر لائن کی جانب سے متحدہ عرب امارات سے پاکستان کیلئے ہفتہ وار متعدد پروازیں چلائی جائیں گی۔ائیر سیال کی جانب سے ابوظہبی سے لاہور کے لئے ہفتہ وار تین جبکہ اسلام آباد کے لئے ہفتہ وار چار پروازیں آپریٹ کی جائیں گی۔ ابوظہبی سے پاکستان کا سفر کرنے کیلئے ائیر سیال نے ابتدائی کرایہ ایک ہزار درہم مقرر کیا ہے۔

ابوظہبی ایئرپورٹس کے مطابق یہ نئی پروازیں پاکستان اور متحدہ عرب امارات کے درمیان مضبوط ہوتے معاشی اور سماجی روابط کی علامت ہیں۔ ائیر سیال کی پہلی پرواز زاید انٹرنیشنل ائیر پورٹ پر پہنچی۔ابوظہبی ائیر پورٹس کی منیجنگ ڈائریکٹر اور سی ای او ایلینا سورلینی کا کہنا تھا کہ ہم ائیر سیال کو زاید انٹرنیشنل ائیر پورٹ پر خوش آمدید کہتے ہیں، یہ نیا روٹ ابوظہبی کے سفر اور تجارت کے روابط کو مضبوط بنانے اور سفری ضروریات پوری کرنے کے ہمارے اسٹریٹجک ویژن کے عین مطابق ہے۔ائیر سیال کے چیئرمین فضل جیلانی نے کہا کہ ابوظہبی کے لیے براہِ راست پروازوں کا آغاز ہماری علاقائی کنیکٹویٹی کو بہتر بنانے کے مشن میں ایک اہم سنگ میل ہے۔انہوں نے کہا کہ یہ نیا روٹ پاکستانی کمیونٹی اور کاروباری سرگرمیوں کے لیے ایک اہم اور سہل رابطہ فراہم کرے گا، جو پاکستان اور یو اے ای کے گہرے اور دیرینہ تعلقات کو مزید مضبوط بنائے گا۔

کریڈٹ: انڈیپنڈنٹ نیوز پاکستان-آئی این پی