لاہور ہائی کورٹ کے جسٹس چودھری سلطان محمود نے شہری کی عدم بازیابی پر ڈی آئی جی انویسٹی گیشن کی رپورٹ پر عدم اطمینان ظاہر کرتے ہوئے بازیابی کیلئے 2 اکتوبر تک مہلت دے دی۔لاہور ہائیکورٹ میں شہری کی عدم بازیابی کے خلاف کیس کی سماعت ہوئی، وفاقی حکومت کی جانب سے خالد نواز گھمن اور پنجاب حکومت کے وکلا پیش ہوئے، ڈی ائی جی نے مغوی کی بازیابی کیلئے کئے گئے اقدامات کی رپورٹ پیش کی۔جسٹس چودھری سلطان محمود نے ڈی آئی جی سے استفسار کیا کہ کیوں شہری بازیاب نہیں ہو رہا؟ ڈی آئی جی انوسٹی گیشن نے بتایا کہ سپیشل ٹیم تشکیل دی ہے، مغوی کی باز یابی کیلئے کوشش کر رہے ہیں۔عدالت نے پوچھا کہ شہری کی بازیابی کیلئے کتنا وقت چاہئے؟ ڈی ائی جی انوسٹی گیشن نے 15 روز کی مہلت مانگ لی ، اس پر جسٹس چودھری سلطان محمود نے کہا کہ ماشااللہ ریمانڈ کا وقت بھی 14 دن کا ہی ہوتا ہے، بازیابی کیس میں اتنا وقت کیسے دے سکتے ہیں ؟۔دوران سماعت وفاقی حکومت کے وکیل نے آگاہ کیا کہ مغوی شہری نیشنل سائبر کرائم انوسٹی گیشن ایجنسی کے پاس نہیں۔بعدازاں عدالت نے سماعت ملتوی کرتے ہوئے ڈائریکٹر ایف آئی اے لاہور اور ڈی آئی جی انوسٹی گیشن کو 2اکتوبر کو طلب کر لیا۔

کریڈٹ: انڈیپنڈنٹ نیوز پاکستان-آئی این پی