لاہور میں ایل پی جی کی شدید قلت پیدا ہو گئی جس کے بعد مافیا نے گیس کی بلیک میں فروخت شروع کر دی ۔لاہور کی مختلف مارکیٹوں میں ایل پی جی 470 روپے فی کلو تک فروخت کی جا رہی ہے جبکہ حکومت کی جانب سے مقرر کردہ سرکاری قیمت 304 روپے فی کلو ہے۔واضح رہے کہ حکومت نے یکم اپریل کو ایل پی جی کی قیمت میں 78 روپے فی کلو کا بڑا اضافہ کیا تھا، تاہم اس اضافے کے باوجود صارفین کو سرکاری نرخوں پر گیس دستیاب نہیں ہے۔ایل پی جی ڈیلرز کا کہنا ہے کہ مارکیٹنگ کمپنیاں مطلوبہ مقدار کے مطابق گیس فراہم نہیں کر رہیں جس کی وجہ سے طلب اور رسد میں بڑا فرق پیدا ہو چکا ہے۔ڈیلرز نے خبردار کیا ہے کہ اگر حکومت نے صورتحال کا فوری نوٹس نہ لیا اور سپلائی بہتر نہ بنائی تو ایل پی جی کی قیمت 500 روپے فی کلو سے بھی تجاوز کر جائے گی۔

کریڈٹ: انڈیپنڈنٹ نیوز پاکستان-آئی این پی