لاہور ہائیکورٹ نے کاہنہ سے مبینہ طور پر اغوا ہونے والی فوزیہ بی بی کی بازیابی سے متعلق دائر متفرق درخواست کو خارج کر دیا۔چیف جسٹس مس عالیہ نیلم نے حمیداں بی بی کی درخواست پر سماعت کی۔دوران سماعت درخواست گزار نے پولیس پر تشدد کا الزام عائد کرتے ہوئے دعوی کیا کہ پولیس نے درخواست واپس لینے کیلئے ان پر دبا ڈالنا شروع کر دیا ہے۔درخواست گزار کے وکیل نے عدالت کو بتایا کہ پولیس نے نہ صرف درخواست گزار بلکہ ان کے دو فیملی ممبرز پر بھی تشدد کیا، درخواست گزار پر دبا ڈالا جا رہا ہے تاکہ وہ اپنی درخواست واپس لے لیں۔

چیف جسٹس مس عالیہ نیلم نے وکیل سے استفسار کیا کہ آپ نے تشدد کا کوئی میڈیکل کرایا ہے؟ وکیل نے جواب دیا کہ ہم جنرل ہسپتال گئے تھے مگر پولیس نے میڈیکل نہیں کروانے دیا۔چیف جسٹس نے مزید سوال کیا کہ جن افراد پر تشدد ہوا وہ کہاں ہیں؟ وکیل نے بتایا کہ وہ گھر پر ہیں، اس پر چیف جسٹس نے ریمارکس دیئے کہ آپ ہوا میں باتیں کر رہے ہیں، کیسے مان لوں؟ عدالت کے سامنے اس دعوے کو ثابت کرنے کیلئے کیا شواہد ہیں؟چیف جسٹس مس عالیہ نیلم نے درخواست کو خارج کرنے کے بعد کہا کہ اس قسم کے دعوئوں کا عدالت کے سامنے ٹھوس ثبوت پیش کیا جانا ضروری ہے، ورنہ صرف زبانی بیانات پر فیصلہ نہیں کیا جا سکتا۔

کریڈٹ: انڈیپنڈنٹ نیوز پاکستان-آئی این پی