کراچی میں نیشنل سائبر کرائم انویسٹی گیشن ایجنسی کے حکام نے چھاپہ مار کر اہم ملزم کو رنگے ہاتھوں گرفتار کرلیا۔ملزم ساگر کمار کو کراچی کے علاقے پی ای سی ایچ ایس سے گرفتار کیا گیا۔ وہ اسی علاقے میں خالد بن ولید روڈ پر واقع عمارت کے ایک فلیٹ کا رہائشی بتایا گیا ہے۔ساگر کمار پر آن لائن مالیاتی فراڈ اور سوشل میڈیا ویب کے ذریعے جوا کھیلنے کا الزام ہے۔ اس کے قبضے سے 3 موبائل فون، کمپیوٹر اور ایک رجسٹر برآمد ہوا ہے جس میں فراڈ سے متعلق کئی امور کا اندراج موجود ہے۔ساگر کمار پر پیکا ترمیمی ایکٹ کی شق 13 اور 14 کے تحت مقدمہ درج کر لیا گیا ہے۔ ایف آئی آر نمبر 107/ 25 ہے۔حکام کے مطابق ساگر جوا کھیلنے کی ویب سائٹس چلاتا اور سائبر اسپیس کے ذریعے جوئے کے لیے ایڈمن اکانٹس کھولتا اور آپریٹ کرتا تھا۔حکام کے مطابق ساگر نے دوران تفتیش آن لائن فراڈ میں ملوث ہونے کا اعتراف کرلیا اور برآمد اشیا نے بھی اس کا فراڈ سے تعلق ثابت کیا ہے۔نیشنل سائبر کرائم انویسٹی گیشن ایجنسی حکام کا کہنا ہے کہ خفیہ اطلاع پر رات ساڑھے8 بجے یہ چھاپہ مفرور عامر علو کی گرفتاری کیلئے مارا تھا۔ ملزم ساگر نے بتایا کہ عامر علو کارروائی سے پہلے ہی فرار ہوگیا تھا۔دوران تفتیش ساگر نے دعوی کیا کہ سشی کمار، سلمان، ظفر اور دیگر بھی فراڈ میں ملوث ہیں۔حکام کے مطابق ملزمان کے خلاف مزید تحقیقات کیلئے اعلی افسر کو مقرر کردیا گیا ہے۔

کریڈٹ: انڈیپنڈنٹ نیوز پاکستان-آئی این پی