خیبرپختونخوا حکومت کی جانب سے قائم انکوائری کمیٹی نے کوہستان میگا کرپشن سکینڈل کی بنیادی وجہ محکمہ سی اینڈ ڈبلیو میں شدید انتظامی کمزوری قرار دے دی۔ میڈیارپورٹ کے مطابق خیبرپختونخوا حکومت کی جانب سے قائم کوہستان میگا کرپشن سیکنڈل کی انکوائری کمیٹی کی رپورٹ 3 صفحات پر مشتمل ہے، حکومت نے 4 ممبران پر مشتمل تحقیقاتی کمیٹی تشکیل دی تھی۔حکومتی انکوائری کمیٹی نے محکمہ سی اینڈ ڈبلیو کا پول کھول دیا، محکمہ سی اینڈ ڈبلیو کی شدید کمزور انتظامی نظام کے باعث کوہستان میگا کرپشن سیکنڈل پیش آیا، محکمے کے اندر کوئی معیاری تقرری و تبادلوں کی پالیسی موجود نہیں۔

رپورٹ کے مطابق محکمہ سی اینڈ ڈبلیو میں بڑے پیمانے پر اضافی چارج دئیے جانے اور سٹاپ گیپ اریجمنٹ کا انکشاف ہوا ہے، محکمے میں اکثر اوقات سینئر کی جگہ جونیئرز افسران کی تعیناتی کی جاتی ہے، غیر منظور شدہ چیک بک جاری کی گئی جس کا ریکارڈ محکمہ کے پاس موجود ہی نہیں۔ رپورٹ میں بتایا گیا کہ ڈیپارٹمنٹل انکوائری کے بغیر ٹھیکیداروں کو ادائیگیاں کی گئیں، ایکسین کوہستان گزشتہ 5 برسوں کی آڈٹ رپورٹ بھی کمیٹی کو جمع نہ کرسکے، کچھ چیکس کی فرانزک کرانے کے لئے لاہور لیب بھیج دیئے گئے۔

کریڈٹ: انڈیپنڈنٹ نیوز پاکستان-آئی این پی