کوئٹہ بلدیاتی انتخابات کی تیاریاں عروج پر ہیں جس کے لیے دو روزہ تربیتی پروگرام کا شاندار آغاز کردیا گیا ہے۔ تفصیلات کے مطابق الیکشن کمیشن آف پاکستان نے بلوچستان میں 28 دسمبر 2025 کو بلدیاتی انتخابات کی شفاف اور پرامن تکمیل کیلئے تیاریوں کو حتمی شکل دیدی ہے۔ اس سلسلے میں کوئٹہ میں پریذائیڈنگ افسران اور سینئر اسسٹنٹ پریذائیڈنگ افسران کیلئے دو روزہ خصوصی تربیتی ورکشاپ کا باقاعدہ آغاز ہو گیا۔ منگل کو تربیتی پروگرام کے پہلے روز صوبائی الیکشن کمشنر بلوچستان انجینئر علی اصغر سیال نے مرد و خواتین دونوں تربیتی مراکز کا تفصیلی دورہ کیا۔ ان کے ہمراہ ڈائریکٹر ایڈمن نعیم احمد جوہر اور ڈپٹی الیکشن کمشنر سید نذیر احمد بھی موجود تھے۔ تربیتی مراکز پہنچ کر صوبائی الیکشن کمشنر نے شریک افسران و عملے سے براہِ راست بات چیت کی اور پولنگ کے دن درپیش ممکنہ چیلنجز، انتخابی قوانین کی پاسداری، بیلٹ پیپرز کی حفاظت، رازداری، اور شفافیت کے تمام پہلوئو ں پر تفصیلی بریفنگ دی۔

علی اصغر سیال نے کہا کہ پریذائیڈنگ افسر اور سینئر اسسٹنٹ پریذائیڈنگ افسر انتخابی عمل کی ریڑھ کی ہڈی ہیں۔ ان کا کردار شفافیت اور غیر جانبداری کو یقینی بنانے میں کلیدی حیثیت رکھتا ہے۔ انہوں نے تربیت حاصل کرنے والے تمام افسران کے جذبے اور لگن کو سراہتے ہوئے کہا کہ آپ لوگوں کی محنت اور پیشہ ورانہ لگن دیکھ کر مطمئن ہوں۔ الیکشن کمیشن آپ کے ساتھ کھڑا ہے اور شفاف، منصفانہ اور پرامن بلدیاتی انتخابات کے انعقاد کے لئے ہر ممکن وسائل بروئے کار لا رہا ہے۔ صوبائی الیکشن کمشنر نے واضح کیا کہ تربیتی پروگرام کا بنیادی مقصد پولنگ اسٹیشنز پر مثر انتظام و انصرام، ووٹرز کی سہولت، اور انتخابی عمل کی سالمیت کو برقرار رکھنے کے لیے افسران کو جدید مہارتیں فراہم کرنا ہے۔

کریڈٹ: انڈیپنڈنٹ نیوز پاکستان-آئی این پی