کے الیکٹرک نے گیس بحران کی وجہ سے اپنے 2 پاور پلانٹس بند کرنے کا اعلان کیا ہے اور پلانٹس کی کی بندش پر پاکستان اسٹاک ایکسچینج کو خط لکھ دیا گیا ہے ۔خط کے متن میں کہا گیا ہے کہ کورنگی ٹائو ن گیس ٹربائن پاور اسٹیشن اور سائٹ گیس ٹربائن پاور اسٹیشن مستقل طور پر اب بند رہیں گی۔خط میں کہا گیا ہے کہ کمپنی کے بورڈ آف ڈائریکٹرز نے دونوں پاوراسٹیشن کو بند کرنے کی منظوری دے دی ہے، کے الیکٹرک دونوں پاور پلانٹس کی مستقل بندش پر نیپرا سے بھی رجوع کرے گی۔کے ای کے خط میں کہا گیا ہے کہ مقامی گیس کی عدم فراہمی اور درآمد کردہ ایل این جی پر انحصار کا تجربہ ناکام رہا، تاہم کے الیکٹرک کا یہ بھی کہنا تھا کہ ان پاور اسٹیشنوں کی بندش سے بجلی کی ترسیل پر کوئی فرق نہیں پڑے گا۔بجلی کی طلب کو پورا کرنے کیلئے 900 میگا واٹ کے بن قاسم پاور پلانٹ کو فعال کر دیا گیا ہے، نیشنل گرڈ سے 2 ہزار میگا واٹ اضافی بجلی لینے کا بھی معاہدہ کیا گیا ہے۔

کریڈٹ: انڈیپنڈنٹ نیوز پاکستان-آئی این پی