انسداد دہشت گردی عدالت نے جناح ہائو س حملہ کیس میں خدیجہ شاہ سمیت 6 ملزمان کو اشتہاری قرار دیتے ہوئے ان کے دائمی وارنٹ گرفتاری جاری کر دئیے ۔عدالت کے مطابق خدیجہ شاہ، فیصل اختر، عادل سعید، سید ارسلان، قاسم منہاس اور عبد اللہ حسن ٹرائل کے لیے بار بار طلبی کے باوجود عدالت میں پیش نہیں ہوئے۔سرکاری وکیل نے عدالت کو بتایا کہ خدیجہ شاہ 9 مئی جلاو گھیراو کے ایک مقدمے میں سزا کے بعد روپوش ہو چکی ہیں جبکہ دیگر ملزمان بھی گرفتاری کے خوف سے پیش نہیں ہو رہے۔استغاثہ کے مطابق عدالت کی جانب سے ملزمان کو پیش ہونے کیلئے مہلت دی گئی تھی، تاہم مقررہ وقت تک کوئی بھی ملزم عدالت کے روبرو پیش نہ ہوا۔

یاد رہے کہ 20 ستمبر 2025 کو خدیجہ شاہ نے جلاو گھیراو کیس میں سنائی گئی سزا کو لاہور ہائیکورٹ میں چیلنج کیا تھا، جہاں انہوں نے وکیل سمیر کھوسہ ایڈووکیٹ کے ذریعے اپیل دائر کی جس میں موقف اختیار کیا تھا کہ خدیجہ شاہ کا مقدمے سے کوئی تعلق نہیں اور انہیں سیاسی بنیادوں پر مقدمے میں نامزد کیا گیا ہے۔واضح رہے کہ لاہور کی انسداد دہشتگردی عدالت نے 9 مئی کے دیگر مقدمات میں بانی پی ٹی آئی کی بہنوں علیمہ خان اور عظمی خان کی ایک روزہ حاضری معافی منظور کرتے ہوئے دیگر ملزمان کی ضمانتوں میں 31 اکتوبر تک توسیع کی تھی۔

کریڈٹ: انڈیپنڈنٹ نیوز پاکستان-آئی این پی