جماعت اسلامی کے ٹائو ن چیئرمینوں کی لوڈشیڈنگ کے خلاف دائر پٹیشن پر دئیے گئے عدالتی حکم کے بعد نیپرا کی اعلی سطحی تحقیقاتی ٹیم کراچی پہنچ گئی۔جماعت اسلامی کے ترجمان کے مطابق کراچی میں کے الیکٹرک کی غیر اخلاقی اور نیپرا قوانین کے خلاف اے ٹی اینڈ سی کی بنیاد پر لوڈشیڈنگ کے خلاف جماعت اسلامی کے 9 ٹائون چیئرمینوں اور سٹی کونسلرز کی جانب سے سندھ ہائیکورٹ میں دائر پٹیشن پر اہم پیش رفت ہوئی ہے۔عدالتی احکامات کے مطابق نیپرا اسلام آباد کا اعلی سطحی وفد کراچی پہنچا اور جماعت اسلامی کے نمائندہ وفد سے تفصیلی ملاقات کی۔ملاقات میں نیپرا تحقیقاتی کمیٹی کے کنوینر نوید الہی شیخ (ڈائریکٹر جنرل کنزیومر افیئرز) ، سفیر حسین(ٹیکنیکل کنسلٹنٹ)، عرفان احمد شیخ (ایڈیشنل ڈائریکٹر مانیٹرنگ و انفورسمنٹ) اور عابد حسین (انچارج نیپرا ریجنل آفس کراچی) موجود تھے۔وفد کی ملاقات میں جماعت اسلامی کے نمائندوں نے نیپرا کو دستاویزی شواہد فراہم کیے۔ نیپرا حکام نے یقین دلایا کہ جمع شدہ مواد کی بنیاد پر ابتدائی تحقیقاتی رپورٹ چند روز میں تیار کر کے سندھ ہائی کورٹ میں پیش کی جائے گی۔جماعت اسلامی کراچی کے وفد نے اس موقع پر کہا کہ شہریوں کو ریلیف دلانے اور کے الیکٹرک کی من مانیاں روکنے کیلئے قانونی اور عوامی جدوجہد بدستور جاری رکھی جائے گی۔

کریڈٹ: انڈیپنڈنٹ نیوز پاکستان-آئی این پی