سندھ کے ضلع گھوٹکی میں گڈوکشمور روڈ پر بس سے اغوا کیے گئے 19 میں سے 11 مسافر بازیاب کرا لئے گئے۔ ڈی ایس پی اوباڑو کا کہنا ہے کہ مغویوں کو سومیانی میں مقابلے کے بعد بازیاب کرایا گیا، مزید مغویوں کی بازیابی کے لئے علاقے کی ناکہ بندی کردی گئی۔پولیس اور رینجرز کی جانب سے ڈاکوئو ں کا تعاقب جاری ہے، ڈرون کی مدد سے کارروائی کی جارہی ہے۔ذرائع کے مطابق پیر ومنگل کی درمیا نی شب گھوٹکی میں ڈاکوئو ں نے 19 مسافروں کو اغوا کرلیا تھا۔ اس حوالے سے پولیس کا کہنا تھا کہ ڈاکوئو ں نے مرید شاخ کے قریب گڈو کشمور روڈ پر مسافر بس پر حملہ کیا اور مسافروں کو اغوا کیا۔عینی شاہدین کے مطابق بس میں خواتین سمیت 25 افراد سوار تھے، ڈاکو خواتین کو چھوڑ کر 19 مردوں کو اپنے ساتھ لے گئے۔ پولیس کے مطابق ڈاکوئو ں نے فائرنگ بھی کی جس سے بس کے شیشے ٹوٹ گئے۔ مسافر بس صادق آباد سے کوئٹہ جارہی تھی۔مسافروں کے اغوا کے بعد پولیس اور رینجرز کو ڈاکوئو ں کے تعاقب میں روانہ کیا گیا۔

کریڈٹ: انڈیپنڈنٹ نیوز پاکستان-آئی این پی