گلگت بلتستان میں نگران کابینہ کے ارکان کو حلف اٹھانے سے قبل ہی محکمے الاٹ کر دئیے گئے ۔ نگران کابینہ کے ارکان کو محکمے تفویض کرنے کا باقاعدہ نوٹیفکیشن جاری کر دیا گیا ۔جاری کردہ نوٹیفکیشن کے مطابق گلگت سے تعلق رکھنے والے ساجد علی بیگ کو محکمہ داخلہ اور جیل خانہ جات کی ذمہ داریاں سونپی گئی ہیں، جبکہ غلام عباس کو اطلاعات اور انفارمیشن ٹیکنالوجی کا قلمدان دیا گیا ہے۔ کرنل (ر)ابرار اسماعیل کو خزانہ، منصوبہ بندی اور ترقیات کے اہم محکمے تفویض کیے گئے ہیں۔اسی طرح انجینئر الطاف حسین کو بلدیات اور دیہی ترقی کا محکمہ دیا گیا ہے، مہرداد کو خوراک جبکہ مولانا سرور شاہ کو معدنیات اور انڈسٹریز کے محکمے الاٹ کیے گئے ہیں۔

نوٹیفکیشن کے مطابق مولانا شرافت دین کو جنگلات، جنگلی حیات اور ماحولیات کی ذمہ داریاں سونپی گئی ہیں، جبکہ سید عدیل شاہ کو اسپورٹس، کلچر اور یوتھ افیئرز کا قلمدان دیا گیا ہے۔نوٹیفکیشن کے مطابق انجینئر ممتاز حسین کو پانی و بجلی، بہادر علی کو تعلیم اور قانون، ڈاکٹر نیاز علی کو صحت جبکہ راجہ شہباز خان کو سیاحت، ایکسائز اینڈ ٹیکسیشن اور ورکس و مواصلات کے محکمے تفویض کیے گئے ہیں۔چودہ رکنی نگران کابینہ میں مشیر کی حیثیت سے شامل واحد خاتون سیدہ فاطمہ کو سوشل ویلفیئر، پاپولیشن اور خواتین کی ترقی کی وزارت دی گئی ہے۔اسی طرح نگران کابینہ میں مشیر کے طور پر شامل عبدالحکیم کو زراعت، لائیو اسٹاک، فشریز اور واٹر مینجمنٹ کے محکموں کی ذمہ داریاں سونپی گئی ہیں۔

کریڈٹ: انڈیپنڈنٹ نیوز پاکستان-آئی این پی