فیصل آباد کے علاقے ملک پور میں فیکٹری کا بوائلر پھٹنے سے دھماکے کے نتیجے میں اب تک 21 افراد کے جاں بحق ہونے کی تصدیق ہوگئی، مرنے والوں میں زیادہ تعداد بچوں اورخواتین کی ہے،جب کہ 5 کے قریب افراد تشویش ناک حالت میں اسپتال میں زیرِ علاج ہیں۔ فیکٹری بوائلر کے پھٹنے سے ہونے والے د ھماکے کی شدت اس قدر زیادہ تھی کہ فیکٹری کی عمارت زمیں بوس ہوگئی اور اسکے اطراف واقع متعدد مکانوں کی چھتیں بھی گر گئی تھیں ۔حادثے میں ایک ہی خاندان کے 7 افراد جاں بحق ہوئے جن میں میاں بیوی اور دو بچے شامل تھے۔ لواحقین کے مطابق تمام افراد گھر میں سو رہے تھے، جب دھماکا ہوا تو پوری عمارت ان پر آ گری۔دوسری جانب مقدمہ مالک اور مینیجر سمیت 7 افراد کے خلاف درج کر لیا گیا ہے، مقدمے کے مطابق خطرناک کیمیکل کے استعمال سے متعدد بار منع کیاگیا، ملزمان نے رہائشی علاقہ میں فیکٹری میں کام جاری رکھا۔پولیس نے فیکٹری کے مالک قیصر چغتائی اور منیجر کو حراست میں لے لیا ہے۔ ڈپٹی کمشنر ندیم ناصر کا کہنا تھاکہ واقعہ بوائلر پھٹنے سے ہوا یا شارٹ سرکٹ سے، ابھی اس کا تعین کیا جا رہا ہے۔واقعے کے بعد علاقہ مکین غم سے نڈھال ہیں۔

کریڈٹ: انڈیپنڈنٹ نیوز پاکستان-آئی این پی