خیبرپختونخوا کے ضلع بنوں میں تھانہ ہوید کی شیخ لنڈک پولیس چوکی پر فتنہ الخوارج کے دہشت گردوں کا حملہ ناکام بنادیا گیا، پولیس کی بروقت و موثرجوابی کارروائی کے دوران پانچ پولیس اہلکار زخمی ہوگئے ۔ترجمان خیبر پختونخوا پولیس کے مطابق پولیس کی موثر جوابی فائرنگ کے نتیجے میں دہشتگردوں کو بھاری جانی و مالی نقصان پہنچنے اور کئی دہشت گردوں کی ہلاکت اور زخمی ہونے کی اطلاعات ہیں۔جوابی کارروائی کے دوران پانچ پولیس کے بہادر جوان معمولی زخمی ہوئے جنہیں فوری طور پر علاج کیلئے ڈسٹرکٹ ہیڈکوارٹرز اسپتال منتقل کیا گیا، جہاں علاج جاری ہے۔ڈی آئی جی بنوں سجاد خان کی خصوصی ہدایات پر ڈی پی او بنوں یاسر آفریدی کی قیادت میں اضافی نفری فوری طور پر موقع پر پہنچ گئی اور علاقے کو گھیرے میں لے کر سرچ آپریشن کا آغاز کر دیا۔ڈی آئی جی بنوں اور ڈی پی او بنوں نے حملہ پسپا کرنے پر پولیس جوانوں کی بہادری کو زبردست الفاظ میں سراہا، شاباش دی اور کہا کہ بنوں پولیس وطنِ عزیز کے تحفظ کے لئے ہر لمحہ تیار ہے اور دہشت گردی کے ناسور کے خاتمے تک چین سے نہیں بیٹھیں گے۔

کریڈٹ: انڈیپنڈنٹ نیوز پاکستان-آئی این پی