سکیورٹی فورسز نے بلوچستان کے علاقے چلتن اور کیچ میں دو کارروائیوں کے دوران فتنہ الہندوستان کے 18 دہشت گردوں کو جہنم واصل کر دیا۔پاک فوج کے شعبہ تعلقات عامہ(آئی ایس پی آر) کے مطابق 28 اور 29 اکتوبر کو بلوچستان میں 2 الگ الگ کارروائیوں میں 18 دہشتگرد ہلاک ہوئے۔ سکیورٹی فورسز کو چلتن کے پہاڑی علاقے میں دہشت گردوں کی موجودگی کی انٹیلی جنس معلومات ملیں جس پر سکیورٹی فورسز فوری حرکت میں آئیں اور آپریشن شروع کر دیا۔ضلع کوئٹہ کے پہاڑی علاقے چلتن میں سکیورٹی فورسز اور بھارتی حمایت یافتہ دہشت گردوں کے درمیان فائرنگ کا شدید تبادلہ ہوا جس کے نتیجے میں 14 دہشت ہلاک ہو گئے۔دوسرے آپریشن میں ضلع کیچ کے علاقے بلیدہ میں خفیہ اطلاع پر دہشت گردوں کی پناہ گاہ کو نشانہ بنایا گیا جہاں بھارتی حمایت یافتہ 4 دہشت گرد ہلاک ہو گئے۔ ان کارروائیوں کے دوران دہشت گردوں سے اسلحہ، گولیاں اور بارودی مواد بھی برآمد ہوا، مارے جانے والے افراد دہشت گردی کی کئی کارروائیوں میں ملوث تھے۔آئی ایس پی آر کے مطابق انسداد دہشت گردی مہم کے تحت دہشت گردوں کے خاتمے کیلئے سرچ آپریشن جاری ہیں اور یہ آخری دہشت گرد کے خاتمے تک جاری رہیں گے۔

پاکستان کی سکیورٹی فورسز اور قانون نافذ کرنے والے اداروں کی جانب سے وفاقی ایپکس کمیٹی کے منظور شدہ قومی ایکشن پلان کے تحت عزمِ استحکام کے وژن کے مطابق انسدادِ دہشت گردی مہم پوری قوت سے جاری رہے گی تاکہ بیرونی حمایت یافتہ دہشت گردی کے ناسور کو ملک سے مکمل طور پر ختم کیا جا سکے۔دریں اثنا صدر مملکت آصف علی زرداری نے چلتن اور بلیدہ میں کارروائی کے دوران 18 بھارتی سرپرستی یافتہ دہشت گردوں کے مارے جانے کو سکیورٹی فورسز کی بڑی کامیابی قرار دیا اور کہا کہ سکیورٹی فورسز کی جانب سے علاقے کی کلیئرنس دہشت گردی کے مکمل خاتمے کے عزم کی عکاس ہے۔انہوں نے کہا کہ سکیورٹی فورسز اور قانون نافذ کرنے والے ادارے عزمِ استحکام کے تحت دہشت گردی کے مکمل خاتمے کے لئے پرعزم ہیں۔وزیراعظم شہباز شریف نے کہا ہے کہ دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے، سکیورٹی فورسز کے عزم و حوصلے کو سلام پیش کرتے ہیں۔انہوں نے کہا کہ ملک سے ہر قسم کی دہشت گردی کے مکمل خاتمے کے لئے پر عزم ہیں۔علاوہ ازیں وفاقی وزیر داخلہ محسن نقوی نے کہا کہ سکیورٹی فورسز نے بروقت کارروائی کرکے بلوچستان میں بھارتی پراکسی فتنہ الخوارج کے ناپاک عزائم کو خاک میں ملا دیا۔

کریڈٹ: انڈیپنڈنٹ نیوز پاکستان-آئی این پی