اسلام آباد میں گاڑیوں کے داخلے کے لیے ایم ٹیگ لگانے کی آخری تاریخ گزر گئی جس کے بعد آ ج (جمعرات)سے ایم ٹیگ کے بغیر گاڑیوں کے خلاف کارروائیوں کا آغاز کیا جا رہا ہے ۔ضلعی انتظامیہ کے مطابق اب تک ایک لاکھ سے زائد گاڑیوں پر ایم ٹیگ لگانے کا عمل مکمل ہو چکا ہے، شہریوں کی سہولت کے پیش نظر ایم ٹیگ سینٹرز پر عملے اور سٹاک میں اضافہ کر دیا گیا ہے تاکہ زیادہ سے زیادہ گاڑیوں کو بروقت ایم ٹیگ فراہم کیا جا سکے، 14 نومبر سے اب تک ایم ٹیگ لگوانے والی گاڑیوں کی تعداد ایک لاکھ سے تجاوز کر گئی ہے۔ڈپٹی کمشنر اسلام آباد عرفان میمن نے کہا ہے کہ یکم جنوری سے شہر کے مختلف انٹری پوائنٹس پر بغیر ایم ٹیگ گاڑیوں کو روکنے کا سلسلہ شروع ہو جائے گا، اس مقصد کے لیے بغیر ایم ٹیگ گاڑیوں کی نشاندہی کرنے والے ٹیگ ریڈرز بھی یکم جنوری سے مکمل طور پر فعال کر دیئے جائیں گے۔دوسری جانب ضلعی انتظامیہ نے شہریوں سے اپیل کی ہے کہ وہ کسی بھی ممکنہ کارروائی سے بچنے کے لیے بروقت اپنی گاڑیوں پر ایم ٹیگ لگوا لیں۔

کریڈٹ: انڈیپنڈنٹ نیوز پاکستان-آئی این پی