اوساکا ایکسپو جاپان 2025 میں پاکستان نے 2 بین الاقوامی ایوارڈز جیت کر عالمی پذیرائی حاصل کرلی۔پاکستانی پویلین کو بیورو انٹرنیشنل ایکسپوزیشن برانز ایوارڈ اور ایگزیبیٹر آن لائن ایڈیٹرز چوائس ایوارڈ ملے۔ پاکستانی پویلین کی جدت، ہنر اور ثقافت کو عالمی سطح پر بھرپور پذیرائی حاصل ہوئی۔پنک سالٹ سے متاثر تخلیقی تھیم ایک ذرہ نمک میں پوری کائنات پر پاکستانی پویلین کو ایڈیٹرز چوائس ایوارڈ ملا، 53 مربع میٹر کے محدود رقبے پر قائم شاہکار پاکستانی پویلین شرکا کی توجہ کا خاص مرکز رہا۔پاکستانی پولین کو محض 6 ماہ میں اب تک 17 لاکھ افراد دیکھ چکے ہیں۔پاکستانی سفیر اور پویلین کے چیف کمشنر عبد الحمید نے اس موقع پر کہا کہ محدود جگہ اور وسائل کے باوجود پاکستان پویلین نے 2 بین الاقوامی ایوارڈز اپنے نام کئے ۔پاکستانی سفیر کا کہنا تھا کہ پاکستان اور اس کے عوام کیلئے یہ لمحہ باعثِ فخر ہے، یہ کامیابی پوری ٹیم کی دن رات محنت اور پیشہ ورانہ صلاحیتوں کا نتیجہ ہے، پاکستان کی اس کامیابی میں وفاقی حکومت کی مکمل سرپرستی شامل رہی۔تخلیقی وژن، قومی جذبے اور مضبوط ٹیم ورک کی بدولت پاکستان نے ایکسپو 2025 میں عالمی سطح پر ممتاز مقام حاصل کیا۔ ایکسپو 2025 کی کامیابی نے پاکستان کی پہچان کو نئی بلندیوں تک پہنچا دیا ہے۔

کریڈٹ: انڈیپنڈنٹ نیوز پاکستان-آئی این پی