ایشیائی ترقیاتی بینک نے سندھ میں ترقیاتی منصوبوں کے لئے شراکت داری جاری رکھنے کی یقین دہانی کرائی ہے۔یہ یقین دہانی اے ڈی بی کی کنٹری ڈائریکٹر ایما فین نے وز یراعلی سندھ سید مراد علی شاہ سے ملاقات میں کرائی ۔اس موقع پر اے ڈی بی کے تعاون سے جاری ترقیاتی منصوبوں کا تفصیلی جائزہ لیا گیا، بی آر ٹی ریڈ لائن، شہری ٹرانسپورٹ، انفراسٹرکچر اور موسمیاتی تحفظ کے منصوبوں پر بریفنگ دی گئی۔ وزیراعلی سندھ نے بی آر ٹی ریڈ لائن پر کام دوبارہ شروع ہونے پر اظہار اطمینان کرتے ہوئے کہا کہ سندھ کے عوام کیلئے اے ڈی بی کے منصوبے خوش آئند ہیں، ایشین بینک سندھ حکومت کا دیرینہ، قابل اعتماد ترقیاتی شراکت دار ہے۔ ی سید مراد علی شاہ نے کہا کہ ٹرانسپورٹ، پانی، موسمیاتی تحفظ اور انفراسٹرکچر میں پائیدار اقدامات جاری رکھیں گے، منصوبوں کی بروقت تکمیل حکومت سندھ کی اولین ترجیح ہے۔

اس موقع پر وزیراعلی نے ایشیائی ترقیاتی بینک کے وفد کو ریڈ لائین منصوبے کی تمام رکاوٹیں دور کرنے اور کام تیز کرنے کی یقین دہانی کرادی۔ ایشیائی ترقیاتی بینک کی کنٹری ڈائریکٹر ایما فین نے سندھ حکومت کے عزم اور کارکردگی کو سراہا اور کہا کہ سندھ حکومت کے اقدامات قابل تعریف ہیں۔ ایما فین نے منصوبوں کی بروقت تکمیل کے لیے اضافی فنڈز فراہم کرنے کی یقین دہانی کراتے ہوئے کہا کہ شہری ٹرانسپورٹ، ترقیاتی منصوبوں کیلئے اے ڈی بی شراکت داری جاری رکھے گا۔ ۔ ملاقات میں صوبائی وزرا شرجیل انعام میمن، جام خان شورو، چیف سیکریٹری آصف حیدر شاہ، چیئرمین پی این ڈی نجم شاہ، سیکریٹری ٹو سی ایم رحیم شیخ اور سیکریٹری ٹرانسپورٹ اسد ضامن اور دیگر افسران شریک ہوئے۔ ایشیائی ترقیاتی بینک کے وفد میں ڈپٹی کنٹری ڈائریکٹر اسد علیم، پروگرام آفیسر خیام سہیل عباسی شامل ، پروجیکٹ آفیسرز حامد خان اور عدنان علی بھی نے اجلاس میں شرکت کی

کریڈٹ: انڈیپنڈنٹ نیوز پاکستان-آئی این پی