سوئی سدرن گیس کمپنی (ایس ایس جی سی) نے آئندہ48 گھنٹے کیلئے سپلائی معطل کرنے کا اعلان کر دیا۔ایس ایس جی سی کی جانب سے جاری بیان کے مطابق سردیوں کے موسم میں گیس کی بڑھتی ہوئی طلب کے پیش نظر کمپنی کی انتظامیہ نے غیر معمولی اقدامات جاری رکھنے کا فیصلہ کیا ہے تاکہ گھریلو اور کمرشل صارفین کو بہتر پریشر مل سکے۔بیان میں کہا گیا کہ اس سلسلے میں صنعتی صارفین بشمول کیپٹو پاور پلانٹس اور تمام سی این جی اسٹیشنز کو گیس کی سپلائی 48 گھنٹے کیلئے معطل رکھی جائے گی، یہ معطلی ہفتہ کو صبح 8:00 بجے سے شروع ہو کر پیر 2 فروری کو صبح 8:00 بجے تک جاری رہے گی۔ایس ایس جی سی کے مطابق اس دوران اگر کسی گھریلو صارف کو کم گیس پریشر کا مسئلہ درپیش ہو تو وہ 24 گھنٹے فعال ہیلپ لائن 1199 پر کال کر کے شکایت درج کروائے، ہمارا عملہ ہر شکایت کو فوری طور پر حل کرے گا۔بیان میں کہا گیا کہ یہ بات قابل ذکر ہے کہ معمول کے مطابق گیس لوڈ مینجمنٹ کے تحت گھریلو اور کمرشل صارفین کو روزانہ رات 10:00 بجے سے صبح 5:00 بجے تک گیس کی سپلائی معطل رکھی جاتی ہے۔

کریڈٹ: انڈیپنڈنٹ نیوز پاکستان-آئی این پی