؁وزیر مملکت برائے امور داخلہ طلال چوہدری نے کہا ہے کہ پاک افغان مذاکرات کا مشترکہ اعلامیہ بہت بڑی کامیابی ہے،افغانستان کی سلامتی وخودمختاری کی ضمانت بھارت نہیں دے سکتا، پاکستان کے اصولی موقف کی جیت ہوئی ہے۔پاک، افغان طالبان مذاکرات کے مشترکہ اعلامیہ پر رد عمل دیتے ہوئے طلال چوہدری نے امید ظاہر کی کہ چیزیں مثبت طریقے سے آگے بڑھیں گی۔انہوں نے کہا کہ افغانستان کا امن پاکستان کے ساتھ جڑا ہوا ہے اور پاکستان چاہتا ہے کہ کسی کی بھی سرزمین پاکستان کے خلاف استعمال نہ ہو۔وزیر مملکت طلال چوہدری نے خبردار کیا کہ بھارت کی پراکسی بننے سے ہوسکتا ہے افغانستان اپنی خودمختاری کھو بیٹھے۔ افغانستان کو سمجھنا چاہیے کہ بھارت انکی سلامتی وخودمختاری کی ضمانت نہیں دے سکتا۔ طلال چودھری نے کہا کہ 6 نومبر کو میکنزم طے کیا جائے گا، مشترکہ مانیٹرنگ سسٹم پر 6 نومبر کو بات چیت ہوگی، امید ہے اب افغانستان سے پاکستان کیخلاف دہشتگردی نہیں ہوگی، خلاف ورزی پر پاکستان افغانستان میں کارروائی کا حق رکھتا ہے۔

کریڈٹ: انڈیپنڈنٹ نیوز پاکستان-آئی این پی