ملک کی3 غیر معروف سیاسی جماعتوں نے الیکشن کمیشن آف پاکستان سے رجوع کیا ہے تاکہ انہیں ایک اتحاد کے طور پر رجسٹرڈ کیا جائے اور مشترکہ انتخابی نشان الاٹ کیا جائے۔ میڈیا رپورٹ کے مطابق ان جماعتوں کا کہنا ہے کہ اتحاد کو مجوزہ نام تحریکِ تحفظِ آئینِ پاکستان(ٹی ٹی اے پی) کے نام سے رجسٹر کیا جائے، جو کہ محمود خان اچکزئی کی قیادت میں موجود ایک اپوزیشن اتحاد کا نام بھی ہے۔درخواست گزاروں میں پاکستان امن تحریک کے چیئرمین علی شیر یوسف زئی، پاکستان فلاحی تحریک کے چیئرمین فضل امان خان، اور پاکستان ویلفیئر پارٹی کے چیئرمین محمد فاروق شامل ہیں۔ٹی ٹی اے پی اتحاد اس اقدام کو اپنے نام کو ہتھیانے اور اپنی مزاحمتی تحریک کو سبوتاژ کرنے کی کوشش قرار دے رہا ہے، اس نے اپنی پوزیشن کے دفاع کیلئے الیکشن کمیشن میں پیش ہونے کے لئے ایک قانونی ٹیم تشکیل دے دی ہے۔

الیکشن کمیشن کے سامنے اتحاد اور اس کی اتحادی جماعتوں کی نمائندگی کرنے والوں میں مصطفی نواز کھوکھر اور جسٹس ریٹائرڈ شاہد ملک شامل ہوں گے۔ٹی ٹی اے پی کے ذرائع نے بتایا کہ یہ اتحاد غیر آئینی اور غیر جمہوری اقدامات کی مزاحمت اور آئین کی بالادستیکیلئے قائم کیا گیا ہے، ماضی میں بھی ایسے اتحاد بنے جو ای سی پی کے ساتھ رجسٹر نہیں تھے، لیکن انہوں نے اپنی تحریکیں جاری رکھیں، اسی لیے اس اتحاد کو بھی باضابطہ طور پر رجسٹر نہیں کیا گیا۔سینئر سیاستدان محمود خان اچکزئی اپنی جماعت پختونخوا ملی عوامی پارٹی (پی کے-میپ ) کے سربراہ بھی ہیں، ان کو 8 فروری کے عام انتخابات کے چند ہفتے بعد ٹی ٹی اے پی کا چیئرمین بنایا گیا تھا، اس اتحاد میں پی ٹی آئی ، پختونخوا ملی عوامی پارٹی اور بلوچستان نیشنل پارٹی مینگل جیسی بڑی جماعتیں شامل ہیں۔

کریڈٹ: انڈیپنڈنٹ نیوز پاکستان-آئی این پی