پنجاب اسمبلی میں 27 ویں آئینی ترمیم کے حق میں قرارداد جمع کرا دی گئی ہے۔یہ قرارداد پاکستان مسلم لیگ (ن)کی رکن اسمبلی حنا پرویز بٹ نے جمع کرائی۔قرارداد کے متن کے مطابق یہ ایوان 27 ویں آئینی ترمیم کی مکمل حمایت کرتا ہے اور اسے ادارہ جاتی استحکام اور شفافیت کی ضامن قرار دیتا ہے، یہ ایوان اس امر پر زور دیتا ہے کہ لوکل گورنمنٹ کو آئینی تحفظ فراہم کیا جائے تاکہ کوئی بھی نظامِ بلدیات پر شب خون نہ مار سکے۔متن میں کہا گیا کہ ایوان نے آئینی عدالت کے قیام کے فیصلے کو بھی خوش آئند قرار دیتے ہوئے کہا کہ ترمیم سے عدلیہ کی آزادی اور غیرجانبداری کو مزید تقویت ملے گی، یہ ایوان تسلیم کرتا ہے کہ ترمیم سے صوبائی خودمختاری اور وفاقی توازن مضبوط ہوگا جبکہ الیکشن کمیشن کو مزید خودمختار اور مثر ادارہ بنایا جا رہا ہے۔قرارداد میں اس بات کا اعتراف کیا گیا کہ یہ ترمیم کوئی انقلاب نہیں بلکہ ادارہ جاتی ارتقا ہے اور وزیرِ اعظم پاکستان کو آئینی اصلاحات پر خراجِ تحسین پیش کیا گیا۔ایوان نے اپنے عزم کا اظہار کرتے ہوئے کہا کہ 27 ویں آئینی ترمیم پاکستان کے اداروں کے استحکام کا سنگِ میل ثابت ہوگی۔

کریڈٹ: انڈیپنڈنٹ نیوز پاکستان-آئی این پی