190ملین پائو نڈز کیس میں بانی پی ٹی آئی عمران خان اور انکی اہلیہ بشری بی بی کے وکیل نے عدالت کی جانب سے مہلت دئیے جانے کے حکم پر اعتراض اٹھا دیا۔اسلام آباد ہائیکورٹ میں 190 ملین پائو نڈ کیس میں اہم پیش رفت سامنے آئی ہے جہاں بیرسٹر سلمان صفدر نے اپیلوں پر دلائل کی آخری مہلت دینے کے عدالتی حکم پر اعتراض اٹھا دیا۔بانی پی ٹی آئی عمران خان اور ان کی اہلیہ بشری بی بی کی جانب سے دائر 2 متفرق درخواستوں میں موقف اختیار کیا گیا ہے کہ احتراما عرض ہے کہ کیس کے حقائق کو مدنظر رکھتے ہوئے آخری مہلت دینے کا حکم سخت، بغیر جواز اور غیر منصفانہ ہے۔بیرسٹر سلمان صفدر نے بانی پی ٹی آئی اور بشری بی بی کی جانب سے دو الگ الگ متفرق درخواستیں دائر کرتے ہوئے جیل میں ملاقات نہ کرانے اور وکالت ناموں پر دستخط نہ کرانے کے خلاف عدالت سے رجوع کیا۔درخواستوں میں استدعا کی گئی ہے کہ بانی پی ٹی آئی اور بشری بی بی سے جیل میں ملاقات کرانے کا حکم دیا جائے جبکہ سپریم کورٹ میں اپیلوں کیلئے وکالت ناموں پر دستخط کرا کے جیل حکام کو دینے کا بھی حکم جاری کیا جائے۔

درخواست میں موقف اختیار کیا گیا کہ 190 ملین پانڈ کیس میں 19 مارچ 2025 سے 30 اپریل 2026 تک کبھی التوا کی درخواست نہیں دی گئی، جبکہ 7 مئی کو پہلی مرتبہ ایک جینوئن وجہ پر التوا کی درخواست دی گئی، وکیل کے مطابق بانی پی ٹی آئی اور بشری بی بی 30 اپریل کے اس عدالت کے فیصلے سے متاثرہ ہیں اور انہیں اس فیصلے کے خلاف اپیل دائر کرنے کا حق حاصل ہے۔درخواست میں یہ بھی کہا گیا کہ جیل سپریٹنڈنٹ غیر قانونی طور پر بانی پی ٹی آئی اور بشری بی بی سے ہدایات کے لیے ملاقات نہیں کروا رہا، سپریم کورٹ میں 30 اپریل کے فیصلے کو چیلنج کرنے کے لیے وکالت ناموں پر دستخط بھی نہیں کروائے جا رہے۔ عدالت سے استدعا کی گئی ہے کہ جیل حکام کو ملاقات کرانے اور وکالت ناموں پر دستخط کرا کے فراہم کرنے کا حکم دیا جائے۔

کریڈٹ: انڈیپنڈنٹ نیوز پاکستان-آئی این پی