سیئول(شِنہوا)عوامی جمہوریہ کوریا (ڈی پی آر کے) نے اپنا پہلا عسکری جاسوس سیٹلائٹ تیار کرنے کیلئے حتمی  ٹیسٹ کا انعقاد کیا  ہے۔

سرکاری کورین سنٹرل نیوز ایجنسی(کے سی این اے) نے پیر کے روز انتظامیہ کے ایک ترجمان کے حوالے سے بتایا کہ نیشنل ایرو اسپیس ڈیولپمنٹ ایڈمنسٹریشن کی جانب سے اتوار کو سوہائے سیٹلائٹ لانچنگ گراؤنڈ میں کیے گئے ٹیسٹ کا بنیادی مقصد سیٹلائٹ فوٹوگرافی، ڈیٹا ٹرانسمیشن سسٹم اور گراؤنڈ کنٹرول سسٹم کی صلاحیتوں کا جائزہ لینا تھا۔

خبر کے مطابق ٹیسٹنگ سیٹلائٹ 20 میٹر ریزولوشن کے ساتھ ایک پینکرومیٹک کیمرہ، دو ملٹی اسپیکٹرل کیمرے اور ویڈیو ٹرانسمیٹر سے لیس تھا جس میں مختلف قسم کے ویو بینڈز کے ساتھ ساتھ کنٹرول ڈیوائسز اور بیٹریوں والے ٹرانسمیٹر اور ریسیورز شامل ہیں۔ سیٹلائٹ کو لے جانے والا ایک راکٹ بالائی زاویے سے 500 کلومیٹر کی بلندی پر چھوڑا گیا۔اس میں کہا گیا ہے کہ ٹیسٹ کے دوران خلائی ماحول میں کیمرہ آپریشن کی ٹیکنالوجی، مواصلاتی آلات کی ڈیٹا پروسیسنگ اور ٹرانسمیشن کی صلاحیت اور زمینی کنٹرول سسٹم کی ٹریکنگ اور کنٹرولنگ کی درستگی سمیت کچھ اہم تکنیکی اشاریوں کی تصدیق ہوئی ہے۔