قاہرہ(شِنہوا)ایک مصری سیاسی ماہر نے کہا کہ عرب ممالک اور چین کے درمیان بیلٹ اینڈ روڈ تعاون کو فروغ دینے سے دوطرفہ تعلقات کی جہتیں مزید گہری ہوں گی۔
الاحرام سینٹر فار پولیٹیکل اینڈ اسٹریٹجک اسٹڈیز میں انٹرنیشنل اسٹڈیز یونٹ اور انرجی اسٹڈیز پروگرام کے سربراہ احمد قندیل نے ایک حالیہ انٹرویو میں شِنہوا کو بتایا کہ "بی آر آئی دنیا بھر میں سب سے اہم ترقیاتی اقدامات میں سے ایک ہے جو عرب ریاستوں اور چین کے درمیان باہمی مفادات کو جنم دیتا ہے۔"
قندیل نے کہا کہ عرب ممالک کے لیے اس اقدام میں شامل ہونا مناسب ہے جو ترقی اور استحکام کے حصول میں معاون ہے۔
مصری ماہر نے کہا کہ عرب ممالک اپنے نوجوانوں کے لیے مزید ملازمتیں فراہم کرنے کے لیے معاشی ترقی کے خواہاں ہیں کیونکہ روزگار کے مزید مواقع پیدا کرنے سے معیار زندگی بلند ہوگااور معاشی اور سماجی استحکام کو اس طرح فروغ ملے گا جس کی عکاسی علاقائی سیاسی استحکام سے ہوگی۔
قندیل نے اپنے نئے انتظامی دارالحکومت میں مصر کے سینٹرل بزنس ڈسٹرکٹ، بندرگاہ کی جدید کاری کے منصوبے اور بینبن سولر انرجی پارک کو مثال کے طور پر پیش کرتے ہوئے کہا کہ بی آر آئی تعاون کے ذریعے اب کچھ ممالک میں مختلف فائدہ مند منصوبوں کے ثمرات نظر آ رہے ہی۔
انہوں نے کہا کہ مصر میں چینی کامیاب منصوبے دیگر عرب ریاستوں کو بیلٹ اینڈ روڈ تعاون کے راستے میں شامل ہونے کی ترغیب دےرہے ہیں۔
