اٹلانٹا،امریکہ (شِنہوا) امریکہ میں چین کے سفیر شیی فینگ نے دونوں ممالک پر زور دیا کہ وہ مشترکہ مفادات کے ساتھ ساتھ بات چیت اور تعاون پر توجہ دیتے ہوئے نشیب وفراز کے باوجود دوطرفہ تعلقات کو مشترکہ طورپرآگے بڑھائیں۔ چین-امریکہ تعلقات کے قیام کی 45ویں سالگرہ کی مناسبت سے کارٹر سنٹر فورم میں  ویڈیو خطاب میں  چینی سفیر نے کہا کہ  چین امریکہ تعلقات ایک بار پھر ایک نئے تاریخی نقطہ آغاز پر ہیں۔ انہوں نے کہا کہ گزشتہ 45 سالوں کے تعلقات کا جائزہ لیتے ہوئے، ہم سمجھتے ہیں کہ سب سے حوصلہ افزاچیز یہ ہے کہ دونوں ممالک کو تعاون سے فائدہ اورچپقلش سے نقصان کا ادراک ہوچکا ہے،اور مل کر کام کرنا ہمارا واحد صحیح انتخاب ہے۔

   سفیر نے کہا کہ ممالک کے درمیان مقابلہ دوڑکے میدان میں ایک دوسرے کے ساتھ مقابلہ کرنے کی طرح ہونا چاہئے، ریسلنگ کے رنگ میں ایک دوسرے کو ہرانا نہیں ہونا چاہئے۔