نئی دہلی(شِنہوا)بھارتی فضائیہ (آئی اے ایف) کا ایک  مگ 21 لڑاکا طیارہ پیر کو مغربی ریاست راجستھان میں گر کر تباہ ہونے سے تین افراد ہلاک ہو گئے۔

حکام اور مقامی میڈیا کی رپورٹوں میں بتایا گیا ہے کہ  طیارہ راجستھان کے صدر مقام جے پور سے تقریباً 415 کلومیٹر شمال میں راجستھان کے ہنومان گڑھ ضلع کے دبلی علاقے میں ایک مکان پر جا گرا۔

نئی دہلی کے ایک ٹیلی ویژن چینل نے مقامی حکام کے حوالے سے بتایا کہ اس حادثے کی وجہ سے گاؤں میں دو خواتین اور ایک مرد سمیت تین افراد ہلاک ہو گئے۔

ٹیلی ویژن کی تصاویر میں جائے حادثہ کے قریب ایک بڑا ہجوم دکھایا گیا ہے اور ان میں سے کچھ زندہ بچ جانے والوں کی تلاش کے لیے امدادی مشینری کے بغیر ہاتھوں سے ملبے کو ہٹایا جا رہا ہے۔ حادثے سے زمین میں ایک بڑا گڑھا پڑ گیا ہے۔

جائے وقوعہ سے دھویں کے بادل اٹھ رہے تھے اور ملبہ چاروں طرف بکھرا ہوا تھا۔

پولیس نے بتایا کہ جس علاقے میں طیارہ گر کر تباہ ہوا وہاں ریسکیو آپریشن شروع کر دیا گیا ہے۔

حکام نے بتایا کہ حادثہ سورت گڑھ ایئربیس سے طیارے کے اڑان بھرنے کے فوراً بعد پیش آیا۔

پائلٹ پیراشوٹ کا استعمال کرتے ہوئے طیارے سے باہر نکلنے میں کامیاب ہوا لیکن اسے کچھ چوٹیں آئیں۔

حادثے کے بعد فوجی ہیلی کاپٹر امدادی کارروائیوں کے لیے جائے حادثہ پر پہنچ گیا۔

آئی اے ایف کے بیان کے مطابق اس کا ایک مگ 21  طیارہ آج صبح معمول کی تربیتی پرواز کے دوران سورت گڑھ کے قریب گر کر تباہ ہو گیا جبکہ پائلٹ بحفاظت باہرنکلنے میں کامیاب رہا جسےمعمولی چوٹیں آئی ہیں۔حادثے کی وجہ معلوم کرنے کے لیے ایک تحقیقاتی ٹیم تشکیل دی گئی تھی۔