جکارتہ(شِنہوا)انڈونیشیا کے صوبہ وسطی جاوا میں ایک شاہراہ پر ٹریفک حادثے میں کم از کم 7 افراد ہلاک اور 6 دیگر زخمی ہو گئے ہیں۔

پولیس نے بتایا کہ پیر کی صبح 7 بجکر 30 منٹ پر صوبائی دارالحکومت سیمارنگ کو بٹانگ کے علاقے سے ملانے والی شاہراہ پر ایک ٹرک اور منی وین کے مابین تصادم ہوا، منی وین میں 13 افراداور ٹرک میں ایک ڈرائیور سوار تھا۔

وسطی جاوا پولیس کے ترجمان اقبال القدوسی نے مقامی میڈیا کو بتایا کہ سیمارنگ جانیوالی ایک منی وین پیچھے سے اس سمت میں جانیوالے ایک ٹرک سے ٹکرا گئی۔ ٹکر کے باعث منی وین اچانک قلابازی کھا کر ایک کھائی میں جا گری۔

افسران نے مزید شناخت کیلئے تمام متاثرین کو قریبی ہسپتالوں میں منتقل کر دیا ہے۔

پولیس کو شبہ ہے کہ حادثہ منی وین ڈرائیور کے دوران سفر نیند میں چلے جانے کے باعث پیش آیا۔